नाशिकच्या मालेगाव शहरात आज सकाळच्या सुमारास कॉलेज स्टॉप जवळ नायट्रोजन गॅसने फुगे फुगवणा-या एका सिलेंडरचा स्फोट झाल्याची घटना घडली असून या ठिकाणी फुगे विकत घेण्यासाठी गेलेले पाच जण जखमी झाल्याची घटना घडली आहे. स्फोट झाल्याचे लक्षात येताच परिसरातील नागरीकांनी धाव घेत जखमींना उपचारासाठी जवळच्या खाजगी रुग्णालयात दाखल केले,यात दोन लहान मुले, महिला आणि दोन पुरुषांचा समावेश असून, यातील दोघे गंभीर जखमी झाल्याने त्यांना अधिक उपचारासाठी नाशिक येथे पाठविण्यात आले आहे.

दरम्यान गॅस सिलेंडर फुटल्याची माहिती मिळताच पोलिसांनी घटनास्थळी धाव घेत तपास सुरु केला आहे. तर हॉस्पिटल परिसरात नागरीकांनी गर्दी केली होती. प्रजासत्ताक दिना निमित्त तिरंगा फुगे फुगवणे सुरू होते. ही फुगे घेण्यासाठी दोन मुले आपल्या परिवारासोबत गेले असता अचानक फुगे फुगवण्याऱ्या नायट्रोजन गॅस मशीनचा स्फोट झाला. यामध्ये हे सर्वजण जखमी झाले. यावेळी उपस्थितांनी तात्काळ सर्वांना जवळच्या रुग्णालयात दाखल केले.

विनोद थोरात, मोहित जाधव, अतुल शेवाळे,प्रमिला यादव आणि उज्वला महाजन असे जखमींचे नाव आहेत. यामध्ये दोन जणांची प्रकृती गंभीर असल्याने त्यांना नाशिकमध्ये पुढील उपचारासाठी हलवले.

घटनेची माहिती मिळताच पोलिसांनी घटनास्थळी धाव घेतली असून स्फोटाचे नेमके कारण काय, याचा तपास सुरू आहे. दरम्यान रुग्णालय परिसरात नातेवाईक व नागरिकांची मोठी गर्दी जमली होती.