अमोल कलये 

रत्नागिरी : जिल्हा परिषद शाळांची अवस्था अतिशय दयनीय झालेली पाहण्यास मिळते. या दरम्यान खेडमधील शिरवली गावातील जिल्हा परिषदेच्या शाळेचे छप्पर आज अचानक कोसळले. मात्र शाळा सुटल्यामुळे विद्यार्थी नुकताच बाहेर गेल्याने ते थोडक्यात बचावले आहेत. 

रत्नागिरी (Ratnagiri) जिल्हा परिषदेची खेडच्या शिरवली गावातील असलेली शाळेची अवस्था अतिशय दयनीय आहे. या शाळेत पहिली ते सातवी पर्यंतच्या वर्गात ३० हून अधिक विद्यार्थी शिक्षणाचे धडे घेत आहेत. या शाळांच्या वर्गखोल्यांचे छप्पर कौलांचे आहे. वर्गखोल्यांची अवस्था खराब असल्याने त्याची दुरुस्तीसाठी दुर्लक्ष केले जाते. जिल्हा परिषद शाळेच्या (Zp School) संदर्भात शासन सुस्त असून अनेक वेळा पाठपुरावा करूनही शाळा दुरुस्तीच्या मागणीकडे प्रशासनाचे दुर्लक्ष करत आहे. यामुळेच आज शाळेचे छप्पर कोसळले आहे. 

मुलांना शाळेत न पाठविण्याचा निर्णय 
सदर घटना घडली यावेळी विद्यार्थी वर्गखोलीत नव्हते, अन्यथा मोठी दुर्घटना घडण्याची शक्यता होती. दरम्यान या घटनेनंतर विद्यार्थ्यांच्या सुरक्षेचा प्रश्न निर्माण झाल्याने संतप्त पालकांनी मुलांना शाळेत न पाठवण्याचा निर्णय घेतला आहे. जोवर शाळा दुरुस्त होत नाही, तोवर मुलांना शाळेत पाठवणार नसल्याचा निर्णय शिरवलीमधील ग्रामस्थांनी घेतला आहे.