Akola News : अकोल्यातील वान धरणावरून (akola wan dam) खारपान पट्ट्यातील 69 गावे पाणीपुरवठा योजनेवरील स्थगिती कायम ठेवावी याप्रमुख मागणीसाठी अकोल्यातील वान धरण परिसरात शेतकऱ्यांनी बेमुदत धरणे आंदोलन सुरू केले आहे. यामुळे शेतकऱ्यांच्या सिंचनाचा प्रश्नावरुन पुन्हा एकदा रान पेटलं आहे. (Maharashtra News)

अकोला जिल्ह्यात सध्या वान धरणाच्या पाण्यावरून राजकारण तापले असून बाळापूर मतदारसंघातील खारपान पट्ट्यातील 69 गावांसाठी पिण्यासाठी या धरणातून पाणी देण्यात यावे आणि योजनेवर लावण्यात आलेली स्थगिती उठवण्यात यावी यासाठी शिवसेना ठाकरे गटाचे आमदार नितीन देशमुख हे आंदोलन करत आहेत.

तर तेल्हारा व संग्रामपूर तालुक्यातील शेतकऱ्यांसाठी महत्त्वाचा समजला जाणाऱ्या व जीवनमानाचा प्रश्न असलेल्या व मूळ सिंचन उद्देश ठेवून बनविण्यात आलेल्या वानधरणावरून अकोला अमृत व बाळापूर 69 खेडी पाणीपुरवठा योजना रद्द करण्यासाठी लोकजागर मंच आणि प्रहारचे प्रदेशाध्यक्ष अनिल गावंडे यांनी शेकडो शेतकऱ्यांसह विविध मागण्यांकरिता वारी हनुमान येथील वान धरणा समोर बेमुदत धरणे आंदोलन सुरू केले आहे.

शेतकऱ्यांच्या सिंचनाचा प्रश्न एरणीवर आला असून या योजनेमुळे सिंचनाचा अनुशेष वाढणार आहे असे अनिल गावंडे यांनी यावेळी सांगितले आहे. त्यामुळे आता कुणाच्या मागणीला यश येते हे येणाऱ्या काळात पाहावे लागणार आहे.

Edited By : Siddharth Latkar