अकोला : निवडणूक आयोगाच्या निकालानंतर उद्धव ठाकरे आणि गटावर मोठं राजकीय संकट कोसळलं आहे. एवढ्या वर्षांचा पक्ष उद्धव ठाकरे यांच्या हातून निसटला आहे. दुसरीकडे ठाकरे गटाची ताकद आणखी कमी होण्याची शक्यता आहे.

कारण काही दिवसांपूर्वीच वंचित बहुजन आघाडी आणि ठाकरे गटाच्या युतीची घोषणा झाली होती. मात्र आता ही आंबेडकर-ठाकरे यांच्यातील युती तुटणार की काय अशी स्थिती निर्माण झाली आहे.

वंचित बहुजन आघाडी आणि उद्धव ठाकरे यांच्या झालेल्या युतीनंतर वंचित-महाविकास आघाडीसोबत जाणार का? असा सवाल जनसामान्यांना पडला आहे. यावर महाविकास आघाडीत चर्चा सुद्धा सुरू आहे. मात्र वंचित बहुजन आघाडीची युती ही उद्धव ठाकरेसोबत असून महाविकासआघाडी सोबत नसल्याचं प्रकाश आंबेडकरांनी स्पष्ट केलं आहे.

उद्धव ठाकरे यांचं काँग्रेस आणि राष्ट्रवादीसोबतचं मनोमिलन कायम राहिलं तर आम्ही पुन्हा एकटे राहणार असं सूचक वक्तव्य प्रकाश आंबेडकर यांनी केलं आहे. याचाच अर्थ म्हणजे भविष्यात वंचित बहुजन आघाडीची एकला चलोची मानसिकता आता पासूनच असल्याचं दिसून येत आहे.