राज्यात स्थानिक स्वराज्य संस्थांच्या निवडणुकांची तयारी जोरात सुरु आहे. अशातच मावळ तालुका राष्ट्रवादी काँग्रेस (शरदचंद्र पवार गट) तर्फे वडगाव मावळ मध्ये झालेल्या कार्यकर्ता आढावा बैठकीत वातावरण चांगलंच तापलं. या बैठकीत बोलताना युवा नेते युगेंद्र पवार यांनी मावळातील आमदार सुनील शेळके आणि उपमुख्यमंत्री अजित पवार यांना थेट नाव न घेता जोरदार टोला लगावला.

काय म्हणाले युगेंद्र पवार ?

कार्यकर्ता आढावा बैठकी दरम्यान उगेंद्र पवार म्हणाले, “बारामतीमध्ये आताही मोठ्या प्रमाणात दहशत आहे. मावळात जे आमदार आहेत त्यांचे खरे बॉस बारामतीत बसले आहेत,” असे वक्तव्य करून युगेंद्र पवार यांनी अजित पवार आणि आमदार सुनील शेळके यांच्यावर अप्रत्यक्ष हल्लाच चढवला.

या बैठकीला कोण उपस्थित होते ?

कार्यकर्ता आढावा बैठकीस पुणे जिल्हाध्यक्ष आमदार जगन्नाथ बापू शेवाळे, युवक जिल्हाध्यक्ष प्रमोदसिंह गोतारणे, ओबीसी विभाग जिल्हाध्यक्ष प्रमोद गोतारणे. मावळचे अध्यक्ष दत्ता पडवळ यांसह अनेक मान्यवरांची उपस्थिती होती.

युगेंद्र पवार यांच्या वक्तव्यामुळे राजकारणात खळबळ

मावळातील पक्ष संघटना मजबूत करण्यासाठी रणनीती, आगामी निवडणुकांची तयारी आणि स्थानिक प्रश्नांवर या बैठकीत सविस्तर चर्चा झाली. मात्र, युगेंद्र पवार यांच्या वक्तव्यामुळे मावळच्या राजकारणात चांगलाच खळबळजनक चर्चेला उधाण आले आहे. दरम्यान युगेंद्र पवार यांच्या वक्तव्यावर उपमुख्यमंत्री काय उत्तर देणार हे पाहणं महत्त्वाचं ठरेल.