अक्षय बडवे

Chandrashekhar Bawankule : खारघर दुर्घटनेमुळे राज्याचं राजकारण चांगलच तापलं आहे. विरोधकांकडून शिंदे फडणवीस सरकारवर सातत्याने आरोपंच्या फैरी झडत आहेत. खासदार संजय राऊत यांनी या घटनेवरून सत्ताधाऱ्यांचा चांगलाच समाचार घेतला असून मुख्यमंत्र्यांवर सदोष मनुष्यवधाचा गुन्हा दाखल करण्याची मागणी जोर धरू लागली आहे. या सर्वांवर आता महाराष्ट्र भाजपाचे प्रदेशाध्यक्ष चंद्रशेखर बावनकुळे यांनी घडलेल्या घटनेत अनेक कारणे असल्याचं म्हटलं आहे. (Political News)

जो कार्यक्रम होता तो नियोजित होता. काही लोकं २४ तास आधीच आले होते. या घटनेला अनेक कारणे आहेत. आमची जबाबदारी आहे कारण सरकारने व्यवस्था केली होती. लोकं आपल्या जीवाची पर्वा न करता अप्पासाहेब यांना बघण्यासाठी आले होते, असं चंद्रशेखर बावनकुळे यांनी म्हटलं आहे.

घटना होऊन गेली आता काय करता येईल आणि या परिवाराच्या मागे सरकार कशा प्रकारे उभे राहील हे बघायला हवं, असंही बावनकुळे यावेळी म्हणाले.

पुढे संजय राऊतांनी राज ठाकरेंवर केलेल्या टीकेला प्रत्युत्तर देत बावनकुळेंनी निशाणा साधला आहे. उद्धव ठाकरे यांचे कौतुक केले तर संजय राऊत यांचा आनंद गगनात मावेना होतो. राज ठाकरे यांच्याबद्दल संजय राऊत काय बोलतात! असे बोलणे योग्य आहे का? राज ठाकरे यांची टीका प्रॅक्टिकल असते हवेत गोळीबार नसतो. ते आमच्यावर सुद्धा टीका करतात. राऊत यांना सत्तेची सवय झाली होती मात्र ती गेली आणि आता संघटना वाढत नाही, असं बावनकुळेंनी म्हटलं आहे.