विनायक वंजारे

सिंधुदुर्ग - हरीहरेश्वर येथे समुद्रकिनारी मिळालेल्या बोटीच्या पार्श्वभूमीवर सिंधुदुर्गातील (Sindhudurg) पोलीस यंत्रणा हाय अलर्ट झाली आहे. काल सायंकाळ पासून समुद्रकिनारी भागात पोलिसांकडून गस्त घालण्यात येत आहे. किनारपट्टी भागात जेथे जेथे होड्या लँडिंग होतात त्यासर्व ठिकाणी तसेच सर्व हॉटेल्स, लॉजेसची तपासणी करण्यात येत आहे.

स्थानिक मच्छीमार, सागर रक्षकदल सदस्य, वॉर्डन यांना देखील सतर्क करण्यात आलेले असून संशयित हालचाल दिसून आल्यास तात्काळ पोलीस ठाण्यास माहिती देण्याबाबत कळविण्यात आलेले आहे. जिल्ह्यात ठिकठिकाणी कडक तपासणी सुरू आहे. मुंबई गोवा महामार्गावरील गोवा सीमेलगत इन्सुलि तपासणी नाक्यावर पोलीस (Police) बंदोबस्त वाढविण्यात आला आहे.

हे देखील पाहा -

गोव्यातून येणाऱ्या व जाणाऱ्या प्रत्येक वाहनांची तपासणी केली जात आहे. किनारी भागात पोलीस कर्मचारी ही तैनात करण्यात आले आहेत. या घटनेमुळे महत्त्वाच्या शहरांमध्ये हाय अलर्ट जारी करण्यात आला आहे. रायगड मुंबईसह पुण्यात देखील हाय अलर्ट जारी केला गेला आहे. याच पार्श्वभूमीवर मुंबईसह पुण्यात नाकाबंदी करण्यात आली आहे.

आज सकाळपासून हरिहरेश्वरच्या समुद्र किनाऱ्यावरही कडक बंदोबस्त तैनात करण्यात आला आहे. रायगड जिल्ह्यातील हरिहरेश्वरच्या समुद्रकिनाऱ्यावर संशयास्पद बोट सापडल्याने परिसरात भीतीचे वातारावण निर्माण झाले आहे. काल सुरक्षा कर्मचाऱ्यांनी तीन एके-47 रायफल असलेली एक संशयास्पद बोट जप्त केली. यानंतर राज्यातील प्रमुखांनी याबाबत खुलासे केले. हे सर्व प्रकरण महाराष्ट्र ATS कडे देण्यात आलं आहे. याप्रकरणाचा पुढील तपास महाराष्ट्र एटीएस करत आहे.

Edited By - Shivani Tichkule