Dharashiv Naldurg Crime News

धाराशिव जिल्ह्यातील नळदुर्ग परिसरात मंगळवारी (२३ जानेवारी) दुपारच्या सुमारास एक भयानक घटना घडली. विहिरीवरील मुरूम रोडच्या कामासाठी पाहिजेत, तुम्हाला विकायचा आहे का? असं म्हणत अज्ञात आरोपींनी एका तरुणाला कारमध्ये बसवलं. त्यानंतर सुसाट वेगाने कार हिंगोली जिल्ह्यातील औंढा नागनाथ येथील डोंगराळ परिसरात नेली.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

तिथे आरोपींनी तरुणाला जीवे मारण्याची धमकी देत ४ लाखांची खंडणी मागितली. इतकंच नाही, तर त्यांनी तरुणाच्या पत्नीला फोन करून पैसे द्या, अन्यथा तुमच्या पतीला संपवून टाकू अशी धमकी देखील दिली. या घटनेनंतर महिलेने तातडीने पोलिसांत (Police) धाव घेतली.

पोलिसांनी तातडीने तपासाची चक्रे फिरवत आरोपींच्या मुसक्या आवळल्या. तसेच तरुणाची सुखरुप सुटका केली. चारही आरोपींवर अपहरण तसेच खंडणीचा गुन्हा दाखल करण्यात आला आहे. या घटनेनं परिसरात मोठी खळबळ उडाली आहे. (Latest Marathi News)

सुधीर शिवाजी राठोड असं अपहरण झालेल्या व्यक्तीचं नाव असून ते पाटील तांडा खुदावाडी परिसरातील रहिवासी आहे. पोलिसांनी दिलेल्या माहितीनुसार, आरोपींनी फोन करून सुधीरला पाटील तांडा येथील जिजामाता बालकाश्रम परिसरात बोलावून घेतले होते.

तिथे गेल्यानंतर आरोपींनी त्याला कारमध्ये बसवले. त्यानंतर सुसाट वेगाने कार हिंगोली जिल्ह्यातील औंढा नागनाथच्या दिशेने नेली. तिथे गेल्यानंतर आरोपींनी सुधीरला जीवे मारण्याची धमकी देत त्याच्याकडे ४ लाखांच्या खंडणीची मागणी केली होती. मात्र, सुधीरच्या पत्नीने वेळीच या घटनेची माहिती पोलिसांना दिली.