• पंढरपूरला जाताना भाविकांच्या कारला अपघात

• सांगोला जुनोनीजवळ घडली अपघाताची घटना

• विठ्ठल दर्शनासाठी निघालेल्या २ भाविकांचा मृत्यू

भरत नागणे, पंढरपूर

पंढरपूरला विठुरायाच्या दर्शनाला निघालेल्या भाविकांवर काळाने घाला घातला. सांगोल्याच्या जुनोनीजवळ भाविकांच्या कारला भीषण अपघात झाला. या अपघातामध्ये दोन भाविकांचा जागाची मृत्यू झाला तर ३ भाविक गंभीर जखमी झाले आहेत. जखमी भाविकांना तात्काळ उपचारासाठी रुग्णालयात दाखल करण्यात आले आहेत. अपघाताची माहिती मिळताच पोलिसांनी घटनास्थळी धाव घेत तपास सुरू केला आहे.

मिळालेल्या माहितीनुसार, अधिक मासाच्या निमित्ताने विठ्ठल-रुक्मिणी दर्शनासाठी पंढरपूरला निघालेल्या भाविकांच्या कारला भीषण अपघात झाला. सांगोला तालुक्यातील जुनोनी गावाजवळ ही भीषण अपघाताची घटना घडली. या अपघातामध्ये दोन भाविकांचा जागीच मृत्यू झाला.‌ रेखा चिंतामणी भोसले आणि संदीप चिंतामणी भोसले या मायलेकाचा अपघातामध्ये मृत्यू झाला. तर तीन गंभीर जखमी आहेत.

हे सर्व भाविक सांगली जिल्ह्यातील पलूस तालुक्यातील असल्याची प्राथमिक माहिती मिळाली आहे‌. चालकाचे कारवरील नियंत्रण सुटल्याने कार थेट रस्त्याच्या कडेला लावण्यात आलेल्या बॅरिकेट्सवर जाऊन आदळली. हा अपघात इतका भीषण होता की कारचा चक्काचूर झाला. अपघातामध्ये जखमी झालेल्या तिघांना उपचारासाठी जिल्हा रुग्णालयात दाखल करण्यात आले आहे. सध्या पोलिस या अपघाताचा तपास करत आहेत. या अपघातामध्ये मृत्यू झालेले भाविकांच्या कुटुंबीयांना घटनेची माहिती देण्यात आली आहे.

दरम्यान, बीडमध्ये भीषण अपघात झाला. दोन दुचाकींची समोरासमोर धडक होऊन हा अपघात झाला. या अपघातामध्ये दुचाकीवरी एका तरुणाचा जागीच मृत्यू झाला. हा तरुण अपघातामध्ये गंभीर जखमी झाला होता त्याने जागीच प्राण सोडले. तर एक तरुण गंभीर जखमी झाला आहे. माजलगाव-सादोळा रस्त्यावर ही घटना घडली. सध्या पोलिस या अपघाताचा तपास पोलिस करत आहेत.