महाराष्ट्रात हिंदी-मराठी भाषा वाद वाढला आहे. काही दिवसांपूर्वी मनसे कार्यकर्त्यांनी मराठी न बोलण्यावरून मिरा-भाईंदरमधील परप्रांतीय व्यापाऱ्याला मारहाण केली होती. व्यापाऱ्याला मारहाण करतानाचा व्हिडिओ सोशल मीडियावर व्हायरल झाला होता. या व्हायरल व्हिडिओनंतर मिरा-भाईंदरमधील परप्रांतीय व्यापाऱ्यांचा मोर्चा निघाला. आता या वादात हिंदूत्वाची एन्ट्री झाली आहे. मराठी भाषेच्या आडून गरीब हिंदूंना टार्गेट केलं जातंय,असा शब्दात मंत्री नीतेश राणे यांनी ठाकरे बंधूंवर प्रहार केला आहे.

मंत्री नीतेश राणे यांनी माध्यमांशी बोलताना मिरा-भाईंदर प्रकरणावरून ठाकरे गट आणि मनसे पक्षांवर जोरदार टीका केली आहे. 'मारहाण करणाऱ्यांना शिक्षा मिळाली पाहिजे. ज्यांनी हिंदूंवर हात उचलला आहे. त्यांच्यावर कारवाई करण्याचं काम सरकार करेल'.

ठाकरे बंधूंवर टीका करताना म्हणाले, 'मराठी भाषेच्या नावाने गरीब हिंदूंवर हल्ला केला आहे. ठाकरे बंधूंनी आता मुस्लिमांना मराठीत अजान वाचण्यास सांगावं. नळ बाजार, भिंडी बाजार, मोहम्मद अली रोड येथे जाऊन दोन्ही पक्षांच्या कार्यकर्त्यांनी हिंमत दाखवावी. त्या भागात कोणीही मराठी बोलत नाही. तिकडे उर्दूशिवाय कोणती भाषा बोलत नाही'.

'मुंब्रामध्ये जाऊन मराठी बोलायला सांगायचं कोणी धाडस करत नाही. मुंब्रा महाराष्ट्रात नाही का? ते पाकिस्तानात आहे का? जावेद अख्तर यांना कोणी मराठीत शायरी बोलायला सांगाल का? तेव्हा सर्व जण शांत असतात. हिंदूंना टार्गेट केलं जात आहे. गरीब हिंदूंना मारहाण केली जात आहे, अशी टीका राणेंनी केली.

'महाराष्ट्रातील मराठी लोक देखील या लोकांच्या विरोधात आहेत. या लोकांकडून हिंदू राष्ट्रात फूट पाडण्याचं काम सुरु आहे. हे लोक दहशतवादी संघटनांना मदत करत आहेत. हिंदूंनी या सरकारची स्थापना केली आहे. हिंदुत्वाच्या विचाराचं हे सरकार आहे. कोणी हिंमत केली तर सरकार तिसरा डोळा उघडेल', असेही राणे पुढे म्हणाले.