जळगाव: केंद्रीय तपास यंत्रणांकडून महाविकास आघाडीच्या नेत्यांवर कारवाया सुरूच आहेत. यावरून आता राष्ट्रवादी काँग्रेसचे नेते एकनाथ खडसे (Eknath Khadse) यांनी भाजपवर हल्लाबोल केला आहे. भाजपच्या दोन-चार नेत्यांना तुरुंगात टाकलं असतं तर, ही वेळ आली नसती, असं खडसे म्हणाले. ते जळगावमधील कार्यक्रमात बोलत होते.

राज्यातील महाविकास आघाडीच्या नेत्यांविरोधात केंद्रीय तपास यंत्रणांकडून कारवाया सुरू आहेत. महाविकास आघाडीतील अनिल देशमुख, नवाब मलिक यांच्यासह संजय राऊत यांच्याविरोधात विविध प्रकरणांत ईडी, आयकर आणि इतर केंद्रीय तपास यंत्रणांकडून कारवाया करण्यात आल्या आहेत. मात्र, या कारवाया राजकीय सूडातून सुरू आहेत, असा आरोप महाविकास आघाडीच्या नेत्यांकडून केला जात आहे. दुसरीकडे, भाजप नेते किरीट सोमय्या हे देखील महाविकास आघाडीच्या नेत्यांवर नवनवे आरोप करत आहेत. केंद्रीय तपास यंत्रणांच्या या कारवायांवरून राष्ट्रवादी काँग्रेसचे नेते एकनाथ खडसे यांनी भाजपवर हल्लाबोल केला आहे. गृहमंत्री दिलीप वळसे पाटील यांनी हिसका दाखवावा. यापूर्वीच भाजपच्या दोन-चार नेत्यांना तुरुंगात टाकलं असतं तर, ही वेळ आली नसती, असं खडसे म्हणाले.

दिलीप वळसे पाटील यांना मी अनेकदा सांगितलं आहे. गृहमंत्रिपदाचा वापर करा. दाखवा एखादा हिसका. दाखवा इंगा. शेकडो प्रकरणं यांची आहेत. दोन-चार भाजप नेत्यांना तुरुंगात टाकलं असतं तर ही वेळ आली नसती. सत्य आहे ते करा. द्वेषाचं राजकारण कुणीही करू नये. जे केलं आहे ते भोगायला लावा, असंही एकनाथ खडसे म्हणाले.