नाशिक जिल्ह्यातील सटाणा शहरालगतच्या यशवंतनगर परिसरात चोरट्यांनी थरारक पद्धतीने ‘स्टेट बँक ऑफ इंडिया’चे संपूर्ण एटीएम मशीनच उचलून नेल्याची धक्कादायक घटना शनिवारी पहाटे तीनच्या सुमारास उघडकीस आली. एटीएममध्ये तब्बल २५ लाख ९९ हजार ४०० रुपये रोकड असल्याचा प्राथमिक अंदाज असून या घटनेमुळे सटाणा शहरासह परिसरात खळबळ उडाली आहे. चोरट्यांनी चोरीस नेलेले एटीएम धुळे जिल्ह्यातील साक्री परिसरात रस्त्याच्या कडेला टाकून दिलेल्या अवस्थेत आढळून आले.

मशीन फोडून त्यातील लाखो रुपयांची रोकड लंपास करण्यात आली आहे. शनिवारी पहाटे तीनच्या सुमारास उघड्या डिक्की असलेल्या बोलेरो जीपमधून तीन चोरटे घटनास्थळी दाखल झाले. गॅस कटरच्या साहाय्याने एटीएम केंद्राचे शटर व लोखंडी गेट तोडून त्यांनी आत प्रवेश केला. त्यानंतर एटीएम मशीनला दोरखंड बांधून वाहनाच्या डिक्कीला जोडत जोरात खेचून संपूर्ण मशीनच वाहनात टाकले. अवघ्या अर्ध्या तासात चोरटे ताहाराबादच्या दिशेने पसार झाले.

​एटीएम खेचताना सुमारे १५ ते २० मिनिटे आपत्कालीन सायरन सुरू होता. मात्र, एवढी मोठी घटना घडत असतानाही परिसरातील कोणाच्याही लक्षात ही बाब न आल्यानं तो चर्चेचा विषय ठरलाय. घटनेची माहिती मिळताच सटाणा पोलिस तत्काळ घटनास्थळी दाखल झाले. बँकेच्या सीसीटीव्ही कॅमेऱ्यात संपूर्ण प्रकार कैद झाला असून, फुटेजचे तांत्रिक विश्लेषण सुरू आहे. चोरीत वापरलेल्या वाहनाचा शोध घेण्यासाठी पोलिसांची पथके विविध ठिकाणी रवाना करण्यात आली आहेत.