Nashik Saptashrungi accident full details : नाशिकमधील सप्तश्रृंगी गडावरुन दर्शन घेऊन परत येताना भाविकांवर काळाने घाला घातला. कार ३०० फूट खोल दरीत कोसळून ६ भाविकांचा मृत्यू झाला. मिळालेल्या माहितीनुसार, घाटात कार ओव्हरटेक करताना अपघात झाला. या कारमधील सर्व भाविक हे पिंपळगाव बसवंतचे रहिवासी आहेत. सप्तश्रृंगी गडाच्या गणपती पॉइंटजवळ रविवारी सायंकाळी हा भीषण अपघात झाला. ओव्हरटेक करताना कार संरक्षण कठाडे तोडून कार ३०० फूट खोल दरीत कोसळली. अपघाताची माहिती मिळताच स्थानिक नागरिकांनी आणि आपत्ती व्यवस्थापन पथकाने घटनास्थळी धाव घेतली अन् बचावकार्य केले. मुख्यमंत्री देवेंद्र फडणवीस आणि पंतप्रधान नरेंद्र मोदी यांनी याबाबत दुख व्यक्त केले.

भाविकांच्या वारसांना ५ लाखांची मदत -

नाशिक जिल्ह्यात सप्तश्रृंगी गडावरून एक वाहन कोसळून झालेल्या अपघातात 6 भाविकांचा मृत्यू झाल्याची घटना अतिशय दुर्दैवी आहे. मी त्यांना भावपूर्ण श्रद्धांजली अर्पण करतो. त्यांच्या कुटुंबीयांच्या दुःखात आम्ही सहभागी आहोत. मृतदेह बाहेर काढण्यासाठी मदतकार्य सुरू असून संपूर्ण यंत्रणा तेथे सज्ज ठेवण्यात आली आहे. या भाविकांच्या वारसांना 5 लाख रुपयांचे आर्थिक सहाय्य राज्य सरकारच्या वतीने देण्यात येईल, असे मुख्यमंत्री देवेंद्र फडणवीस यांनी सांगितले.

MH 15 BN 0555 या कारमधून भाविक सप्तशृंगी गडावर श्री सप्तशृंगी मातेचे दर्शन घेण्यासाठी गेले होते. दर्शन घेऊन घराकडे परत येत असताना काळाने घाला घातला. ओव्हरटेक करत असताना चालकाचे नियंत्रण सुटले अन् कार कठडे तोडून थेट ३०० फूट खोल दरीत कोसळली. घाटातील गणपती पॉइंटजवळ ही घटना घडली. या अपघातातील सर्वजण हे पिंपळगाव बसवंत येथील रहिवासी होते. किर्ती पटेल (वय 50), रशिला पटेल (वय 50), विठ्ठल पटेल (वय 65), लता पटेल (वय 60), पचन पटेल (वय 60), मनी बेन पटेल (वय 70) यांचा या अपघातात मृत्यू झाला आहे. एकाच कुटुंबातील सहा जणांचा दुर्दैवी मृत्यू झाल्याने दु:ख व्यक्त केलं जात आहे.