Kalyan News : उल्हास नदी वाचवा, ग्रामस्थांकडून निषेधाची होळी; थेट दिला आंदोलनाचा इशारा

संघर्ष गांगुर्डे, साम टीव्ही

देशभरात होळीचा सण साजरा होत असताना कल्याणमधील मोहाने येथे उल्हास नदी प्रदूषणाकडे लक्ष वेधण्यांसाठी निषेध होळीचे आयोजन करण्यात आलं होतं. कल्याणमधील मोहने परिसरात उल्हास नदी किनारी आज सोमवारी निषेध होळी कार्यक्रम उत्साहात आणि निर्धारपूर्वक पार पडला.

होळीच्या माध्यमातून नदी प्रदूषणाविरोधात जनजागृती करण्याचा आणि संबंधित यंत्रणांना जबाबदार धरण्याचा प्रयत्न करण्यात आला. सध्या उल्हास नदीतील वाढते सांडपाणी, औद्योगिक रसायने आणि कचऱ्यामुळे नदीचे अस्तित्व धोक्यात आले आहे. याचा थेट परिणाम परिसरातील नागरिकांच्या आरोग्यावर होत असल्याची भावना गावकरी आणि स्थानिकांनी व्यक्त केली.यावेळी गावकऱ्यांनी उल्हास नदीचे संरक्षण हे केवळ पर्यावरणाचे नाही, तर जनतेच्या आरोग्याचे आणि भावी पिढ्यांच्या हक्काचे साठी आंदोलन असल्याचे सांगितले.

आगामी काळात जनतेच्या प्रश्नांना प्राधान्य देत पारदर्शक आणि जबाबदार नेतृत्व देण्याचा निर्धार असून नदी प्रदूषण रोखण्यासाठी ठोस कृती आराखडा राबवण्याचीमागणी यावेळी करण्यात आली.या वेळी मोठ्या संख्येने गावकरी व स्थानिक नागरिक आणि नदी बचाव समितीचे कार्यकर्ते उपस्थित होते.

यावेळी प्रशासनाचा निषेध व्यक्त करत नदी वाचवा भविष्य वाचवा, असा जोरदार घोषणा देखील दिल्या निषेध होळीच्या माध्यमातून प्रशासनाने तातडीने कारवाई करून नदी स्वच्छतेसाठी ठोस पावले उचलावीत, अन्यथा तीव्र जनआंदोलन उभारण्याचा इशाराही यावेळी गावकऱ्यांनी आणि स्थानिक नागरिकांनी दिला आहे.उल्हास नदीचे अस्तित्व टिकवण्यासाठी आता नागरिक रस्त्यावर उतरले असून, येणाऱ्या काळात या आंदोलनाची तीव्रता वाढण्याची शक्यता व्यक्त केली जात आहे.