केंद्र सरकारच्या निर्णयामुळे पुन्हा एकदा कांदा उत्पादक शेतकऱ्यांच्या डोळ्यात पाणी आणले आहे. देशाच्या काही भागात कांद्याचे दर ८० ते ९० रुपये किलोपर्यंत पोहचले आहेत. मात्र केंद्राने ५ राज्यातील निवडणुका डोळ्यासमोर ठेवून या राज्यांमध्ये २५ रुपये प्रति किलो दराने बफर स्टॉकमधील कांद्याची विक्री सुरू केली आहे. परिणामी नाशिकच्या बाजार समित्यांमध्ये कांद्याच्या दरात जवळपास १ हजार रुपयांपर्यंत घसरण झाल्याने शेतकऱ्यांमध्ये संतापाचे वातावरण निर्माण झाले आहे.
कधी ग्राहकांच्या तर अनेकदा उत्पादक शेतकऱ्यांच्या डोळ्यात पाणी आणणाऱ्या कांद्याने पुन्हा एकदा उत्पादक शेतकऱ्यांच्या डोळ्यात पाणी आणले आहे. अतिवृष्टी आणि दुष्काळी परिस्थितीमुळे नाशिक जिल्ह्यातील कांदा उत्पादक शेतकऱ्यांना मोठं आर्थिक नुकसान सोसावे लागले होते. देशांतर्गत बाजारात कांद्याचा तुटवडा निर्माण झाल्याने बाजारात कांद्याचे भाव वधारल्याने थोड फार नुकसान भरून निघेल, असं शेतकऱ्यांना वाटत होते.
मात्र केंद्राने पुन्हा एकदा शेतकऱ्यांच्या अपेक्षांवर पाणी फिरवले आहे. मध्यप्रदेश, राजस्थान, मिझोराम, तेलंगणा आणि छत्तीसगड या ५ राज्यांमधील निवडणुका डोळ्यासमोर ठेवून तेथील मतदारांना खुश करण्यासाठी तिथं २५ रुपये प्रतिकिलो दराने आपल्या बफर स्टॉकमधील कांदा विक्री सुरू केली आहे. परिणामी नाशिकमधील बाजार समितीत कांदा दरात १ हजार रुपयांनी घसरण झाल्याने शेतकऱ्यांमध्ये संतापाचे वातावरण आहे.
बाजारात घटलेली आवक आणि मागणीत झालेली वाढ यामुळे मागील काही दिवसांपासून कांद्याच्या भावात तेजी पाहायला मिळत होती. बाजारात शेतकऱ्यांना कांद्याला ५० ते ६० रुपये किलो भाव मिळत होता. परिणामी याआधी अतिवृष्टी आणि दर नसल्याने मोठे नुकसान उत्पादक शेतकऱ्यांना सोसावे लागले.
हे नुकसान काहीसे भरून निघण्यास मदत होईल, असे शेतकऱ्यांना वाटत होते. मात्र केंद्र सरकारचे कांद्याबाबतचे धरसोड धोरण उत्पादक शेतकऱ्यांच्या मुळावर उठले असून शेतकऱ्यांच्या पदरी पुन्हा निराशाच पडली आहे. (Latest Marathi News)
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.