अभिजीत सोनवणे, साम टीव्ही

नाशिक पोलिसांनी शहरात कारवाईचा धडाका लावला आहे. सोशल मीडियावर गुन्हेगारी स्टाईल्स रिल्स करणाऱ्यांच्या मुसक्या आवळण्याचं काम नाशिक पोलि‍सांकडून केलं जात आहे. काही दिवसांपूर्वी पोलिसांनी गुन्हेगारी स्टाइल रिल्स तयार करणाऱ्या तरुणांना दणका दिला होता. त्यानंतर आता याच पद्धतीने दोन तरुणींचा व्हिडिओ व्हायरल झाला आहे. या तरुणींना देखील नाशिक पोलिसांनी दणका दिला आहे.

नाशिकमध्ये गुन्हेगारी स्टाइल रिल्स तयार करणं दोन तरुणींच्या चांगलंच अंगलट आलं आहे. गुन्हेगारी स्टाइल रिल्स तयार करून व्हायरल करणाऱ्या तरुणींचा माज पोलिसांनी उतरवला आहे. नाशिकच्या रामकुंड परिसरात दोन्ही तरुणींनी रील तयार केला होता. तरुणी रील तयार करताना म्हणत आहे की, हे नाशिक आहे भावा, इथे तू इज्जत दिली तर तुला इज्जत भेटेल, नाहीतर तुझी डेडबॉडी थेट सिविलला भेटेल'.

दोन्ही तरुणींचा गुन्हेगारी स्टाईल रील सोशल मीडियावर प्रचंड व्हायरल झाला. गुन्हेगारी स्टाईल्स रिल्स करणाऱ्या दोन्ही तरुणींना देवळाली कॅम्प पोलिसांनी ताब्यात घेतलं. त्यानंतर पोलिसांनी माज उतरवल्यानंतर दोन्ही तरुणींनी माफीनामा सादर केला.

सातपूर गोळीबार प्रकरणात मोठी अपडेट

नाशिकच्या सातपूर गोळीबार प्रकरणात मोठे अपडेट समोर आली आहे. माजी नगरसेवक प्रकाश लोंढेच्या कार्यालयातील भुयारात शस्त्र सापडले. त्याच्या भुयारात दोन कुऱ्हाडी, एक चाकू पोलिसांनी जप्त केला. दुसरीकडे फरार भूषण लोंढेच्या मागावर परराज्यात चार पोलिसांची पथके रवाना झाली आहेत. प्रकाश लोंढेच्या अनधिकृत मालमत्तांवर नाशिक मनपा हातोडा चालवणार आहे. अपहरण झालेल्या डॉक्टरांसह कुटुंबांचा पोलिसांकडून शोध सुरू आहे.