अभिजीत सोनावणे, साम टिव्ही

नाशिकमधून एक धक्कादायक बातमी समोर येत आहे. माजी केंद्रीय मंत्री रावसाहेब दानवे यांचे नातू शिवम पाटील यांच्यासह आठ जणांविरोधात फसवणुकीचा गुन्हा दाखल करण्यात आला आहे. कंपनीच्या शेअरमध्ये भागीदारी करून त्याबदल्यात देण्यात येणाऱ्या रकमेपैकी १० कोटी न दिल्याप्रकरणी ही तक्रार दाखल करण्यात आली आहे. तक्रारीनुसार, पोलिसांनी गुन्हा दाखल केला आहे.

मिळालेल्या माहितीनुसार, ही तक्रार भाजपचे पदाधिकारी आणि उद्योजक कैलास आहेर यांनी नाशिकच्या सातपूर पोलीस ठाण्यात केली आहे. कैलास आहेर यांनी आपल्या कंपनीत रावसाहेब दानवे यांचे नातू शिवम पाटील आणि इतर काही जणांना भागीदारी दिल्याचा आरोप केला आहे.

कैलास आहेर कंपनीचे मालक आहेत. त्यांनी पोलीस तक्रारीत म्हटलं की, 'माजी केंद्रीय मंत्री रावसाहेब दानवे यांच्या सांगण्यावरून मी या व्यक्तींना माझ्या कंपनीत भागीदारी दिली होती. परंतु भागीदारी दिल्यानंतर मला ठरलेले काही पैसे मिळाले नाहीत', असं आहेर यांनी आपल्या तक्रारीत नमूद केलं.

कैलास आहेर यांच्या म्हणण्यानुसार, रावसाहेब दानवे यांच्या सांगण्यावरून त्यांनी कंपनीचे १४ टक्के शेअर्स दिले होते. या शेअर्सच्या बदल्यात २५ कोटी रूपयांचा व्यवहार ठरला होता. मात्र, त्यापैकी १० कोटी रूपयांचा भरणा अद्याप करण्यात आलेला नाही, अशी माहिती आहेर यांनी तक्रारीत नमूद केलं आहे. या प्रकरणी पोलिसांनी तक्रारीनुसार, गुन्हा दाखल करण्यात आला असून, पुढील तपास पोलिसांकडून सुरू आहे.