नाशिक: माजी महापौर अशोक मूर्तडक यांच्यावर आत्महत्येस प्रवृत्त केल्याचा गुन्हा पंचवटी पोलिस ठाण्यात दाखल करण्यात आला आहे. महाराष्ट्र नवनिर्माण सेनेचे माजी पदाधिकारी आणि मनपा निवडणुकीत शिंदेसेनेत प्रवेश केलेल्या पंचवटीतील एका कार्यकर्त्याला मूर्तडक यांनी घरी जाऊन मारहाण तसेच अश्लील भाषेत शिवीगाळ केली. त्यातून नैराश्य आल्याने शिंदेसेनेचा कार्यकर्ता योगेश बाळकृष्ण दाभाडे याने फिनेल पिल्याची खळबळजनक घटना घडली असून या प्रकरणी माजी महापौर मूर्तडक यांच्यावर आत्महत्येस प्रवृत्त केल्याचा गुन्हा दाखल झाला आहे.

फिनेल पिल्याने शिंदेसेनेच्या कार्यकर्त्याला उपचारासाठी जिल्हा रुग्णालयात दाखल केले होते. मात्र प्रकृती चिंताजनक असल्याने शहरातील खाजगी रुग्णालयात हलविल्याचे सूत्रांनी सांगितले. योगेश बाळकृष्ण दाभाडे यांनी दिलेल्या फिर्यादीनुसार त्यांनी सुमारे वर्षभरापूर्वी माजी महापौर अशोक मूर्तडक यांच्याकडून 90 लाख उसने घेतले होते. त्यातील काही रक्कम परत दिल्यानंतर उर्वरित पैशांसाठी मूर्तडक यांनी त्रास दिल्याचा आरोप आहे.

पैशांच्या वसूलीसाठी मूर्तडक यांनी दाभाडे यांना वारंवार धमकावले, तसेच त्यांच्या कुटुंबियांबाबतही अश्लील भाषेत शिवीगाळ करीत 13 मार्च रोजी त्यांनी दाभाडे यांच्या घरी जाऊन अपमानास्पद वर्तन करत गंभीर परिणामांची धमकी दिल्याचा आरोप आहे. दरम्यान 1 एप्रिल रोजी दाभाडे उपचारासाठी खासगी रुग्णालयात दाखल असताना मूर्तडक यांनी तेथेही जाऊन पैशांसाठी दमदाटी केल्याची तक्रारीत नमूद आहे. त्यानंतर 15 एप्रिलला पुन्हा दाभाडे यांच्या घरी जाऊन वाद घालत मारहाण केली होती.