सागर निकवाडे, नंदुरबार|ता. २२ डिसेंबर २०२३

Saranghkheda Chetak Festival 2023:

अश्वांची पंढरी म्हणून ओळख असलेल्या सारंगखेड्यात घोडे बाजार सुरू झाला आहे. देशाच्या कानाकोपऱ्यातून इथे घोडे दाखल होतात. अवघ्या १५ दिवसात १० ते १२ कोटींची उलाढाल होणारा हा घोडेबाजार देशभरात प्रसिद्ध आहे. यंदा उत्तर प्रदेश बरेली येथील राधा घोडी या बाजाराचे मुख्य आकर्षण ठरत आहे. काय आहे या घोडीची खासियत जाणून घ्या.

उत्तरप्रदेशच्या राधाची चर्चा...

सारंगखेडा घोडे बाजारात दाखल झालेल्या उत्तर प्रदेशच्या बरेली येथील राधा घोडीची चर्चा आहे. तिची अदा, सौंदर्य, तिची चाल आणि रुबाबामुळे ही घोडी या बाजाराचे मुख्य आकर्षण ठरत आहे. म्हणूनच राधा घोडीची किंंमत तब्बल १ कोटी इतकी आहे. आतापर्यंत 70 लाखापर्यंत तिची बोली लागली आहे. मात्र मालकाला ही घोडी विकायची नाही, कारण ती जातिवंत असल्याने ती त्यांच्या अश्वशाळेत अश्वपैदास करण्यासाठी आहे. त्यातून मिळणारे उत्पन्न जास्त असल्याचे ते सांगतात.

काय आहे राधा घोडीची खासियत?

उत्तरप्रदेशच्या बरेली येथील नजीम भाई यांच्या आर एस अश्व शाळेतील ही घोड असून तिची उंची ७२ इंच इतकी आहे. देशभरात होणाऱ्या अश्व स्पर्धेसाठी ती जात असते. राधा ही देशातील सर्वात उंच घोडी असल्याचा दावा तिच्या मालकांनी केला आहे. ही मारवाड जातीची घोडी असून पांढरी शुभ्र रंगाची आहे. तिला दिवसाला 7 लिटर दुध तसेच मका, राईचे तेल बदाम गावरान अंडी दिले जात असतात. तिची देखभाल करण्यासाठी ३ जण तैनात असतात.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

मध्यप्रदेशच्या गब्बरनेही वेधले लक्ष!

दरम्यान, या राधा घोडीसोबत बाजारात अजूनही काही आकर्षक अश्व दाखल झाले आहेत. ज्यामध्ये मध्यप्रदेशच्या (Madhya Pradesh) गब्बरचाही समावेश आहे. मध्यप्रदेश मधील उज्जैन येथील दिपक जैन यांच्या मालकीचा हा अश्व पंजाबी नुकरा जातीचा आहे. याची किंमत मालकाने ११ लाख ठेवली आहे. (Latest Marathi News)