सागर निकवाडे 

नंदुरबार : नंदुरबारमध्ये मागील आठवड्यात दोन गटात दंगल उसळली होती. या दंगलीनंतर जनमानसात पोलीस दलाविषयी अप्रीतीची भावना निर्माण केली. तसेच दोन समाजामध्ये तेढ व भीतीचे वातावरण निर्माण होईल, असा मजकुर व्हॉटसॲप ग्रुपवर प्रसारीत केला. या प्रकरणी नंदुरबार येथील एकाविरोधात गुन्हा दाखल करण्यात आला आहे.

नंदुरबार (Nandurbar) येथे चार दिवसापूर्वी दोन गटात मोठी दंगल झाली होती. त्यात दंगेखोरांनी पोलिसांना लक्ष केले. गृह रक्षक दलातील जवान आणि पोलीस कर्मचारी व पोलिस अधिकारी यांच्यासह २३ जण या दंगलीत जखमी झाले होते. तर पोलिसांच्या (Police) वाहनांसह २६ वाहनांचे नुकसान झाले. जाळपोळीमुळे अनेक घरांचे व दुकानांचे देखील नुकसान झाले. दरम्यान या दंगलींनंतर नंदुरबारमध्ये दोन दिवस तणावाचे वातावरण पसरले होते. 

दरम्यान, या दंगली संदर्भात आक्षेपार्ह माहिती प्रसारित करण्यात आली होती. या माहितीबाबत पोलिसांना दिसून आले. त्यावरून त्यांनी कारवाई सुरू केली. अशाच प्रकारे दोन समाजात तेढ निर्माण होईल अशा प्रकारचा मजकूर व्हाॅट्स ॲपवर चुकीची माहिती प्रसारित करण्याने एका जणाला महाग पडले असून त्याच्या विरोधात नंदुरबार पोलिसात गुन्हा दाखल करण्यात आला आहे.