संजय सूर्यवंशी, साम टीव्ही, प्रतिनिधी

ग्राहकाकडून दोनशे रुपये मोबाईलवर मागवून का घेतले म्हणून मॅनेजरने अपमान करून कामावरून काढले. हाच अपमान सहन न झल्याने एका 19 वर्षीय तरुणाने राहत्या घरी गळफास घेऊन आत्महत्या केली. नांदेड शहरातील सांगवी प्रभागातील गोपाळनगर येथे ही घटना घडली. या घटनेमुळे परिसरात खळबळ उडाली आहे.

रविराज पुंडलिक इंगळे आत्महत्या केलेल्या तरुणाचे नाव आहे. या प्रकरणी विमानतळ पोलीस ठाण्यात कंपनीचा मॅनेजवर आत्महत्येस प्रवृत्त केल्याचा गुन्हा दाखल करण्यात आला आहे. रविराज इंगळे हा छत्रपती चौक येथील इजी डील फायनान्स कंपनीमध्ये कम्प्युटर ऑपरेटर पदी काम करत होता.

२४ जून रोजी रविराज नेहमीप्रमाणे कामावर गेला होता. याच दरम्यान त्याने आपल्या मोबाईलवर एका ग्राहकाचे दोनशे रुपये ऑनलाईन मागवून घेतले होते. ही बाब फायनान्स कंपनीचा मॅनेजर मंगेश मग्गीवार याला समजली. त्यानंतर मॅनेजरने ग्राहकाचे २०० रुपये का घेतले म्हणून त्याला सर्वासमोर रागावले. तसेच मोबाईल काढून घेऊन कामावरून काढून टाकले.

सर्वांसमोर झालेला अपमान सहन न झाल्याने रविराजने गळफास घेऊन आत्महत्या केली.रविराजच्या मृत्यूस मॅनेजर जवाबदार असल्याचा आरोप रविराजच्या आई-वडिलांनी केला आहे.आरोपीला पोलिसांनी अटक केल्याची माहिती आहे. रविराज हा एकुलता एक मुलगा होता. मुलाने उचललेल्या टोकाच्या पाऊलामुळे कुटुंबियांवर दुःखाच डोंगर कोसळलं आहे.