पराग ढोबळे, साम टीव्ही

नागपूर : नागपूर रामटेक तालुक्यातील खैरी बिजेवाडा ग्रामपंचायत हद्दीतील पाचगाव येथे शनिवारी सायंकाळी अत्यंत दुर्दैवी घटना घडली आहे. खड्ड्यात बुडून दोन शाळकरी चिमुकल्यांचा दुर्दैवी मृत्यू झाला आहे.

मिळालेल्या माहितीनुसार, शाळेतून सुट्टी झाल्यानंतर खेळण्यासाठी गेलेल्या दोन सहा वर्षीय मुलांचा खोल खड्ड्यात बुडून मृत्यू झाला.खैरी बिजेवाडा पाचगाव येथील रहिवासी सात वर्षीय उत्कर्ष लोकेश लांजेवार आणि रिधान संजय सहारे दोघेही दुपारी शाळेतून घरी परतले. रविवारी सायंकाळी जेवण केल्यानंतर खेळायला घराबाहेर गेले. घराजवळूनच काही अंतरावर असलेल्या एका खड्ड्याजवळ ते पोहोचले. दिवसभर पाऊसाच्या सरीमुळे खड्ड्यात पाणी साचले होते.

पाण्यात खेळण्यासाठी पायातील चप्पल बाहेर काढून खड्ड्यात उतरले. मात्र खड्डा खोल असल्याने त्या दोन्ही मुलांना पाण्याचा अंदाज न आल्याने बुडून मृत्यू झाला. खेळायला गेले मात्र उशिरापर्यंत घरी परतले नसल्यानं शोधाशोध सुरू झाली. घराजवळच काही अंतरावर खड्ड्याजवळ दोन्ही मुलांच्या चपला दिसून आल्या.

एकाने खड्ड्यात उतरून पाहिले असता पाण्याखाली एक मुलगा आढळून आला. तर आणखी शोध घेतला असता दुसऱ्या मुलाचा मृतदेह दिसून आल्यानं हंबरडा फोडला. या घटनेने परिसरात हळहळ व्यक्त केली जात आहे. मुलांच्या आई-वडिलांच्या पायाखालून जणू जमीनच घसरली. संपूर्ण घटनेची माहिती रामटेक पोलिसांना देण्यात आली आहे. पोलिसांनी दोन्ही मुलांच्या शवविच्छेदनानंतर अंत्यसंस्कार पार पडलाय.