Wardha Rain : पावसाने केली दैना! घर कोसळलं, कुटुंबावर शौचालयात राहण्याची वेळ

चेतन व्यास, साम टीव्ही

वर्धा : मुसळधार पावसाने वर्ध्यात राहणाऱ्या लोकांची दैना झाली आहे. वर्ध्यातील एका कुटुंबाला मुसळधार पावसाचा मोठा फटका बसला आहे. त्यांचं पावसामुळे घर कोसळल्यामुळे स्नानगृह आणि शौचालयात राहण्याची वेळ आली आहे. या दुर्घटनेतून सुदैवाने वृद्ध आई आणि मुलगा बचावला आहे.

मागील दोन दिवसांपासून वर्धा जिल्ह्यात पावसाच्या सरी बरसत आहे. सततच्या पावसामुळे काही ठिकाणी घरांची पडझड झालीय. अशातच हिंगणघाट तालुक्यातील सावली वाघ येथे घर कोसळल्याने वृद्ध आईसोबत मुलाला घरातील स्नानगृह आणि शौचालयात राहण्याची वेळ आली आहे. शनिवारी दुपारी चार वाजता दरम्यान घर कोसळलं असून तातडीने मदतीची मागणी करण्यात आली आहे.

सावली वाघ येथील श्रीराम डंभारे हे आपल्या वृद्ध आईसोबत येथे राहतात. रोजमजुरी करणाऱ्या श्रीरामची परिस्थिती हलाखीची असल्याने त्याचे घर कच्चे आहे. दोन दिवसांपासून सतत सुरु असलेल्या पावसामुळे आज शनिवारी चार वाजता अचानक घर कोसळत असल्याचे लक्षात आले. त्यानंतर तातडीने श्रीरामने आपल्या आईला बाहेर काढले यामुळे मोठी घटना टळली.

श्रीरामाचं पूर्ण घर पडल्याने त्याला आईसोबत घरातील स्नानगृह आणि शौचालयात राहण्याची वेळ आली आहे. दुपारपासून घडलेल्या घटनेची अद्याप कोणी दखल घेतली नाही, तसेच अद्याप कोणी घटनास्थळी भेट दिली नाही.प्रशासनाने तातडीने घटनास्थळी भेट देत या कुटुंबाला मदत करण्याची मागणी सावली वाघ येथील नागरिकांनी केली आहे.