Nagpur Latest News: नागपूरमध्ये एक धक्कादायक घटना घडली आहे. इथं एका पोलीस शिपायाने विद्युत डीपीला स्पर्श करत आपलं जीवन संपवलं आहे. काशिनाथ कराडे असं मयत पोलीस शिपायाचे नाव आहे. या घटनेमुळे संपूर्ण परिसरात एकच खळबळ माजली आहे.

या घटनेचा व्हिडीओ देखील समोर आला आहे. या व्हिडीओत दिसत असल्याप्रमाणे काशिनाथ कराडे हे रस्त्याच्या कडेने चालत विद्युत डीपीच्या कॅबिनकडे येतात. यानंतर ते विद्युत डीपीच्या कॅबिनचे दरवाजे उघडतात आणि मागे फिरतात. मागे येऊन ते कोणालातरी आपल्या फोनवरून मेसेज करताना दिसत आहेत.

फोनवर मेसेज केल्यानंतर ते पुन्हा विद्युत डीपी कॅबिनकडे जातात आणि त्याला स्पर्श करत जीवन संपवण्याचा प्रयत्न करतात. मात्र असं करत असताना ते खाली पडतात. यानंतर ते पुन्हा जाऊन विद्युत डीपीला स्पर्श करतात, यावेळी मात्र ते खाली पडतात, ते कायमचेच.  (Latest Political News)

काशिनाथ कराडे यांनी आपलं जीवन का संपवलं, हे अद्याप कळू शकलेलं नाही. या घटनेमुळे पोलीस दलाला देखील धक्का बसला आहे. त्यांच्या आकस्मिक मृत्युची नोंद करण्यात आली आहे.

या घटनेचा व्हिडीओ सध्या खूप व्हायरल होत आहे. त्यांनी आपलं जीवन संपवण्याचं इतक्या टोकाचं पाऊल का उचललं? त्यांच्यावर कोणत्या प्रकारचा काही दबाव होता का? ज्यामुळे ते तणावात होते, या संपूर्ण प्रकाराबाबत पोलीस अधिक तपास करत आहेत.