पराग ढोबळे, नागपूर प्रतिनिधी

डॉक्टरच्या आत्महत्येने उपराजधानी नागपूर हादरलेय. शासकीय वैद्यकीय महाविद्यालय आणि रुग्णालयातील (GMC) एका निवासी डॉक्टरने हॉटेलमध्ये गळफास घेऊन आत्महत्या केल्याची धक्कादायक घटना उघडकीस आली आहे. रुत्वीक सागर ठाकूर (वय २६) असे या मृत डॉक्टरचे नाव आहे. रुत्वीकच्या आत्महत्येच्या घटनेमुळे नागपूरमधील वैद्यकीय क्षेत्रात मोठी खळबळ उडाली आहे.

नागपूरमधील शासकीय वैद्यकीय महाविद्यालयाच्या नेत्ररोग विभागातील (Ophthalmology) २६ वर्षीय निवासी डॉक्टर रुत्वीक सागर ठाकूर (वय २६, रा. बुलढाणा) यांनी आत्महत्या केल्याची घटना उघडकीस आली. नागपूरमधील गणेशपेठ बसस्थानकाजवळील एका हॉटेलमध्ये गळफास घेऊन रुत्वीकने आयुष्याचा दोर कापला. मूळचा बुलढाणा येथील रहिवासी असलेला रुत्वीक ठाकूर हा हुशार विद्यार्थी होता. त्याच्या अकाली जाण्याने ठाकूर कुटुंबावर दुखाचा डोंगर कोसळलाय.

बुलढाण्याच्या रुत्वीकने नुकताच नागपूर मेडिकलमध्ये नेत्ररोग विषयात पदव्युत्तर अभ्यासक्रमासाठी प्रवेश घेतला होता. २७ जानेवारी २०२६ रोजी कॉलेजमध्ये रुजू झाला होता. ते विभागप्रमुख डॉ. दिलीप उमरे यांच्या युनिटमध्ये कार्यरत होते. पण काही दिवसांपासून तो गैरहजर होता. त्यामुळे त्याचा हॉटेलमध्ये तपास केला असता घटना उघडकीस आली. रुत्वीक याने आत्महत्या का केली? याचं कारण अद्याप अस्पष्टच आहे. गणेशपेठ पोलिसांकडून तपास करीत आहेत.

वैद्यकीय क्षेत्रात करिअर घडवण्याचे स्वप्न घेऊन नागपुरात आलेल्या रुत्वीकने अवघ्या ७ ते ८ दिवसांतच टोकाचे पाऊल का उचलले? याचे कारण अद्याप समजू शकलेले नाही. घटनास्थळी कोणतीही 'सुसाईड नोट' सापडली आहे का, याचा तपास पोलीस करत आहेत. गणेशपेठ पोलीस ठाण्यात याप्रकरणी आकस्मिक मृत्यूची नोंद करण्यात आली असून पुढील तपास सुरू आहे.