नागपूर ते गोवा प्रवास आता अवघ्या 8 तासांत पूर्ण करता येणार आहे. नागपूर-गोवा शक्तिपीठ महामार्गाच्या कामाला वेग आला असून, या महामार्गामुळे विदर्भ, मराठवाडा, पश्चिम महाराष्ट्र आणि कोकणातील प्रवास अधिक जलद होण्याची अपेक्षा आहे. तब्बल 856.765 किलोमीटर लांबीचा हा महामार्ग महाराष्ट्रातील 13 जिल्ह्यांतून जाणार आहे. या प्रकल्पासाठी आतापर्यंत 144 गावांमधील संयुक्त मोजणी सर्वेक्षण पूर्ण झाले असून, आणखी 265 गावांमध्ये सर्वेक्षणाचे काम सुरू आहे. या महामार्गामुळे नागपूर, यवतमाळ, सोलापूर आणि कोल्हापूरसह अनेक शहरांची गोव्याशी थेट कनेक्टिव्हिटी मजबूत होणार आहे. सध्या नागपूर ते गोवा प्रवासासाठी सुमारे 18 तास लागतात. मात्र, शक्तिपीठ महामार्ग पूर्ण झाल्यानंतर हा प्रवास 8 तासांत पूर्ण होण्याचा अंदाज व्यक्त केला जात आहे.

महाराष्ट्रात शक्तिपीठ महामार्गाच्या सर्वेक्षणाला वेग

नागपूर-गोवा शक्तिपीठ महामार्ग प्रकल्पासाठी महाराष्ट्रात जमीन मोजणी आणि सर्वेक्षणाचे काम वेगाने सुरू आहे. सांगली, सोलापूर आणि कोल्हापूर जिल्ह्यांमध्ये नव्याने संयुक्त मोजणी सर्वेक्षण सुरू करण्यात आले आहे. आतापर्यंत 144 गावांतील सर्वेक्षण पूर्ण झाले असून, उर्वरित गावांमध्ये प्रक्रिया सुरू आहे. याआधी वर्धा आणि यवतमाळसारख्या विदर्भातील जिल्ह्यांमध्येही सर्वेक्षणाचे काम पूर्ण करण्यात आले आहे. राज्य सरकारने या महत्त्वाकांक्षी प्रकल्पासाठी भूसंपादन पूर्ण करण्याचे नियोजन केले आहे. डिसेंबर 2027 पर्यंत भूसंपादनाची प्रक्रिया पूर्ण करण्याचे आणि जानेवारी 2028 पासून प्रत्यक्ष बांधकाम सुरू करण्याचे नियोजन आहे. मात्र, प्रत्यक्ष काम सुरू होण्याची तारीख प्रशासकीय प्रक्रिया आणि आवश्यक मंजुरींवर अवलंबून असेल.

शक्तिपीठ महामार्ग कोणत्या जिल्ह्यांतून जाणार?

नागपूर ते गोवा हा शक्तिपीठ महामार्ग महाराष्ट्रातील 13 जिल्ह्यांतून जाणार आहे. या प्रकल्पासाठी 40 तालुक्यांमधील 409 गावांतील सुमारे 8,760 हेक्टर जमिनीची आवश्यकता आहे.

प्रत्येक शहरातून किती किमीपर्यंत असणार हा महामार्ग

वर्धा - 35 किलोमीटर

यवतमाळ -137 किलोमीटर

नांदेड - 20 किलोमीटर

हिंगोली - 70 किलोमीटर

परभणी - 60 किलोमीटर

बीड - 39 किलोमीटर

लातूर - 43 किलोमीटर

धाराशिव - 40 किलोमीटर

सोलापूर - 130 किलोमीटर

सातारा - 49 किलोमीटर

सांगली - 72 किलोमीटर

कोल्हापूर - 125 किलोमीटर

सिंधुदुर्ग - 36 किलोमीटर

या महामार्गाचा सर्वाधिक भाग यवतमाळ, सोलापूर आणि कोल्हापूर जिल्ह्यांतून जाणार आहे. त्यामुळे या जिल्ह्यांतील वाहतूक आणि दळणवळण व्यवस्थेला फायदा होणार आहे.

नागपूर ते गोवा प्रवास 18 तासांऐवजी 8 तासांत?

सध्या नागपूर ते गोवा हे सुमारे 840 किलोमीटरचे अंतर पार करण्यासाठी प्रवासाला साधारण 18 तास लागू शकतात. शक्तिपीठ महामार्ग पूर्ण झाल्यानंतर हा प्रवास अवघ्या 8 तासांत पूर्ण होण्याचा अंदाज आहे.

2028 पासून बांधकाम सुरू होण्याची शक्यता

शक्तिपीठ महामार्गासाठी सध्या सर्वेक्षण, जमीन मोजणी आणि भूसंपादनाशी संबंधित प्रक्रिया सुरू आहे. उर्वरित गावांमधील सर्वेक्षण पूर्ण झाल्यानंतर भूसंपादनाच्या कामाला पुढील गती मिळण्याची अपेक्षा आहे. तसेच पर्यावरणविषयक आवश्यक मंजुरी मिळवण्याची प्रक्रियाही सुरू आहे. नियोजनानुसार, डिसेंबर 2027 पर्यंत भूसंपादन पूर्ण करून जानेवारी 2028 पासून प्रत्यक्ष बांधकाम सुरू करण्याचे उद्दिष्ट आहे.