सुरज सावंत

Lok Sabha Election 2024 :

राज्यात सर्वत्र लोकसभा निवडणुकीचे वारे वाहू लागले आहेत. येत्या १९ तारखेला पहिल्या टप्प्यातील मतदान पार पडणार आहे. मात्र अद्यापही महायुतीमध्ये जागावाटपाचा तिढा सुटलेला नाही. त्यात दक्षिण मुंबई मतदारसंघ चर्चेत आला आहे. येथे एकाचवेळी तीन इच्छुक उमेदवारांनी आपल्या प्रचाराला देखील सुरूवात केलीये.

त्यामुळे आता दक्षिण मुंबईतील महायुतीचा उमेदवार कोण? असा प्रश्न उपस्थित झाला आहे. एकाच वेळी मंत्री मंगलप्रभात लोढा, विधानसभा अध्यक्ष राहुल नार्वेकर आणि शिवसेना नेते यशवंत जाधव प्रचारासाठी सक्रिय झाले आहेत. तीन इच्छुकांमुळे महायुतीचे कार्यकर्ते संभ्रमात आहेत. तर नेत्यांसमोर मोठा पेच निर्माण झालाय.

दक्षिण मुंबई मतदारसंघात उमेदवारी मिळावी यासाठी इच्छूक असलेले मंत्री मंगलप्रभात लोढा राज ठाकरेंची भेट घेणार आहेत. थोड्याच वेळात ते शिवथीर्थ निवासस्थानी दाखल होतील, अशी माहिती समोर आली आहे.

मंत्री लोढा दक्षिण मुंबईतून लोकसभा लढवण्यास इच्छुक आहेत. अशात मनसे अध्यक्ष राज ठाकरे यांनी पंतप्रधान नरेंद्र मोदींना बिनशर्त पाठिंबा जाहीर केला. त्यानंतर आता लोढा यांना त्यांचा पाठिंबा मिळाला तर दक्षिण मुंबईत महायुतीची जागा भक्कम होईल. त्यामुळे मंत्री लोढा राज ठाकरेंकडे पाठिंबा मागण्याची शक्यता आहे.

दक्षिण मुंबई मतदार संघात महाविकास आघाडीचा उमेदवार फिक्स करण्यात आला आहे. महाविकास आघाडीकडून ही जागा ठाकरे गटाला मिळाली असून अरविंद सावांत यांच्या नावाची घोषणा करण्यात आली आहे. एकीकडे अरविंद सावंत यांनी देखील आपल्या प्रचाराला सुरुवात केलीये तर दुसरीकडे या जागेसाठी महायुतीचा उमेदवारच अद्याप ठरलेला नाही.