• मनसेचे महाड शहरप्रमुख पंकज उमासरे यांना मारहाण

• चवदार तळे येथील दुकानात शिरून केली मारहाण

• महाडच्या ग्रामीण रुग्णालयात उपचार सुरू

सचिन कदम, महाड | साम टीव्ही

स्थानिक स्वराज्य संस्थांच्या निवडणुका होऊ घातल्या आहेत. त्यामुळं सगळीकडंच वातावरण तापलं आहे. सत्ताधारी आणि विरोधकांमध्ये शाब्दिक चकमकी सुरू झाल्या आहेत. पण काही ठिकाणी टीका-टिप्पणीचा वाद हाणामारीपर्यंत पोहोचला आहे. महाडमध्ये मनसेच्या पदाधिकाऱ्याला बेदम मारहाण झाल्याची घटना घडली आहे.

मनसेचे महाड शहरप्रमुख पंकज उमासरे यांना काही जणांनी बेदम मारहाण केली. ही मारहाण गंभीर स्वरुपाची आहे. उमासरे यांचे चवदार तळे येथे दुकान आहे. त्या दुकानात घुसून हल्लेखोरांनी मारहाण केली.

उमासरे यांनी दोन दिवसांपूर्वी राज्याचे मंत्री आणि शिंदेंच्या शिवसेनेचे नेते भरत गोगावले यांच्याविरोधात एका युट्यूब चॅनलला मुलाखत दिली होती. याच रागातून त्यांना मारहाण झाल्याचा संशय व्यक्त करण्यात येत आहे.

या प्रकरणात वृत्त प्रसिद्ध करेपर्यंत अद्याप कोणतीही तक्रार दाखल करण्यात आली नाही. मारहाणीत गंभीर जखमी झालेल्या पंकज उमासरे यांच्यावर महाडच्या ग्रामीण रुग्णालयात उपचार सुरू आहेत. उमासरे यांची वैद्यकीय चाचणी करण्यात येत आहे.