गेल्या ५ महिन्यांत ठाकरे बंधूंची तब्बल १२ वेळा भेट झाली. ५ जुलै ते २७ नोव्हेंबर या कालावधीत दोघांमध्ये अनेकदा चर्चा झाली. यामुळे ठाकरे बंधूंच्या संभाव्य युतीबाबत चर्चांना उधाण आलं आहे. मात्र, अद्याप अधिकृतपणे युतीची घोषणा करण्यात आलेली नाही. आगामी स्थानिक स्वराज्य संस्थांच्या निवडणुकांच्या पार्श्वभूमीवर ठाकरे बंधुंच्या भेटींना महत्व प्राप्त झालं आहे. याच दरम्यान, ठाकरे बंधूंबाबत एक मोठी बातमी समोर येत आहे. मुंबईसह राज्यातील ७ जिल्ह्यांमध्ये ठाकरे बंधू एकत्रितपणे निवडणूक लढवणार असल्याची माहिती समोर आली आहे.

मुंबईसह ७ जिल्ह्यांत ठाकरे बंधू एकत्र निवडणूक लढवणार असल्याची माहिती सुत्रांकडून प्राप्त झाली आहे. मुंबई, ठाणे, वसईमध्ये शिवसेना - मनसे युती करणार असल्याची माहिती समोर आली आहे. नाशिक, पुणे तसेच पिंपरी चिंचवडमध्ये देखील ठाकरे बंधू युती करून निवडणूक लढवणार असल्याची शक्यता वर्तवली जात आहे.

७ जिल्ह्यांमध्ये ठाकरे बंधू एकत्र निवडणूक लढवणार असल्याची चर्चा सुरू असून, या चर्चांमुळे राजकीय वर्तुळात खळबळ उडाली आहे. मिळालेल्या माहितीनुसार, महायुतीला रोखण्यासाठी उद्धव ठाकरे राज ठाकरे यांना सोबत घेण्यावर आग्रही असल्याचं म्हटलं जात आहे. भाजप तसेच एकनाथ शिंदेंची शिवसेना यांच्या विरोधात मैदानात उतरण्यासाठी ठाकरे बंधू सज्ज आहेत. दरम्यान, निवडणूक जरी जाहीर केली नसली तरी, ठाकरे बंधूंनी मैदानात उतरण्यासाठी तयारी केली असल्याचं बोललं जात आहे

मुंबई महापालिका निवडणुकीतील जागावाटपावरून उद्धव ठाकरे आणि राज ठाकरे यांच्यात चर्चा सुरू झाली असल्याची माहिती आहे. गुरूवारी उद्धव ठाकरेंनी शिवतीर्थावर जाऊन राज ठाकरेंची भेट घेतली. मुंबई महापालिकेत एकूण २२७ जागा असून, सूत्रांनी दिलेल्या माहितीनुसार, मनसे ७५ ते ८० जागांची अपेक्षा आहे. प्रत्येक विधानसभेत किमान १ जागा, तर मराठी बहुल भागांमध्ये २ ते ३ जागा मिळाव्यात, अशी मनसेची मागणी आहे. दरम्यान, निवडणुकीची घोषणा अद्याप झाली नसली तरी, जागावाटपाची जोरदार तयारी सुरू आहे. हे ठाकरे बंधूंच्या भेटीगाठी आणि हालचालींवरून स्पष्ट होत आहे.