अकोला : अजित पवारांच्या राष्ट्रवादीतील दोन नावं... माणिकराव कोकाटे आणि अमोल मिटकरी.... एक पक्षाचा मंत्री...तर दुसरा पक्षाचा आमदार... मात्र, दोघांनाही जोडणारा एक सामायिक धागा म्हणजे त्यांची वादग्रस्त वक्तव्य... आज अजित पवार यांच्या राष्ट्रवादीचे हे दोन्हीही नेते एकत्र एकाच व्यासपीठावर आले होते. निमित्त होतं अकोला जिल्ह्यातील अकोट शहरात आयोजित पक्षाच्या कार्यकर्ता मेळाव्याचं.

अकोला शहरातील झुनझूनवाला सभागृहात अकोला जिल्ह्याचा पक्ष कार्यकर्ता आणि पक्षप्रवेश सोहळा पार पडलाय. या कार्यक्रमाला उपस्थित राज्याचे क्रीडामंत्री माणिकराव कोकाटे यांनी आमदार अमोल मिटकरींची तोंडभरून स्तुती केलीय.

एव्हढेच नव्हे तर अमोल मिटकरी आपले 'गुरु' असल्याचं माणिकराव कोकाटे म्हणालेय. विधानसभा निवडणुकीत अमोल मिटकरी यांनी आपल्या मतदारसंघातून सभा घेतल्यानेच आपण 3 हजार मताने का होईना, मात्र काठावर निवडून आल्याचं कोकाटे म्हटलं.

दोघांचंही दुखणं सांगताना माणिकराव कोकाटे म्हणालेत की, बोलणाऱ्यांनाच लोक नाव ठेवतात. मात्र, आपण आता आणि भविष्यातही अमोल मिटकरी यांच्या पाठीशी खंबीरपणे उभे राहणार असल्याचं माणिकराव कोकाटे म्हणाले.

दरम्यान, माणिकराव कोकाटे गेली पाच टर्म नाशिक जिल्ह्यातील सिन्नर मतदारसंघातून वेगवेगळ्या पक्षांतून विधानसभेवर निवडून येत आहेत.‌ तर अमोल मिटकरी पहिल्यांदाच विधान परिषदेचे आमदार बनले. त्यातच कोकाटे यांनी मिटकरींना गुरु म्हटल्याने सर्वांच्या भुवया उंचावल्या आहेत.

याच कार्यक्रमात आगामी स्थानिक स्वराज्य संस्थांच्या निवडणुकीत राज्यभरात राष्ट्रवादी काँग्रेसच्या उमेदवारांना जास्तीत जास्त संख्येनं निवडून द्या. अजित पवारांचे हात बळकट करा, असं आवाहनही यावेळी माणिकराव कोकाटे यांनी केलंय.

दरम्यान, शिंदे गटाचे माजी आमदार सदा सरवणकर यांनी केलेल्या वक्तव्यावर बोलतांना त्यांनी सरकार सर्वच आमदारांना समान निधी देत असल्याचे म्हटलंय. शहरानुसार निधीचे हेड बदलत असल्याने निधी कमी-जास्त होत असल्याचं ते म्हटलेय. तर कुंभमेळ्यासाठी गिरीश महाजन यांच्या नेतृत्वात जी समिती बनली आहे, त्यात इतर पक्षांच्या मंत्र्यांना दुय्यम स्थान मिळाले आहे का? यावर त्यांनी बोलतांना म्हटले की मुख्यमंत्र्यांना ते अधिकार आहे आणि त्यांनी घेतलेला निर्णय योग्य असल्याचा कोकाटे म्हटले.