- सागर निकवाडे

Nandurbar :

नंदुरबार विसरवाडी रस्त्यावरील कुंभारपाडा फाट्याजवळ आज (गुरुवार) सकाळी दूध वाहतूक करणा-या वाहनाचा अपघात झाला. या अपघातात दूध वाहतूक करणारे वाहन उलटल्याने रस्त्यावर दूधाची गंगा वाहिली. या अपघातामुळे कुंभारपाडा फाटा मार्गावरील वाहतुक काही काळ विस्कळीत झाली. (Maharashtra News)

या घटनेबाबत मिळालेली प्राथमिक माहिती अशी : एक दुध वाहतुक करणारे वाहन आज सकाळी विसरवाडी परिसरातून दूध संकलन करून गुजरात राज्यातील सुबीर येथे निघाले हाेते. विसरवाडी जवळील कुंभारपाडा फाट्याजवळ चालकाचा वाहनावरील ताबा सुटला आणि अपघात झाला.

या वाहना मधील दुधाचे भरलेले कॅन रस्त्यावर पडले. यामुळे हजारो लिटर दूध रस्त्यावर सांडले. या अपघातात वाहनचालक किरकोळ जखमी झाला आहे. रस्त्यावर विखुरलेले दुधाचे कॅन स्थानिक नागरिकांनी आणि कुंभारपाडा येथील राजपाल गावित, युवराज गावित यांनी बाजूला केले. यामुळे रस्त्यावरील वाहतूक सुरळीत झाली. अपघातग्रस्त वाहन चालकास विसरवाडी ग्रामीण रुग्णालयात उपचारासाठी दाखल करण्यात आले आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

Edited By : Siddharth Latkar