मावळ : वाढत्या नागरीकरणामुळे आणि काँक्रीटच्या जंगलामुळे शहरातील हिरवाई कमी होत चाललेली आहे. यामूळे पर्यावरणाचा प्रश्न ऐरणीवर आला आहे. तर शरीराला शुद्ध हवा आणि सेंद्रिय पद्धतीचे भाज्या मिळणे कठीण झाले आहे. मात्र मावळच्या तळेगाव दाभाडे येथील एका उच्चशिक्षित महिलेने स्वतःच्या इमारतीवर टेरेस गार्डन फुलवले असून त्यांचा हा प्रयोग यशस्वी झाला आहे. 

मूळच्या पुणे जिल्ह्यातील खेड गावच्या असलेल्या सुजाता महिले यांच्या आई- वडिलांकडे सात एकर बागायती शेती आहे. सुजाताताई या आईसोबत लहानपणी रोज शेतात जाऊन शेतीचे काम करीत असत. मात्र लग्न झाल्यानंतर त्या तळेगावमध्ये स्थायिक झाल्या. मनातील शेती करण्याची इच्छा तशीच राहिली. मात्र शेतीत फळभाज्या आणि झाडांची अतिशय आवड असल्याने टेरेस गार्डनच्या माध्यमातून त्यांनी हा छंद जोपासला आहे. 

पाच वर्षांपासून फुलवताय टेरेस गार्डन 

मावळतील तळेगाव दाभाडे येथे त्यांची तीन गुंठे जागेत सदनिका आहे. या सदनिकेच्या टेरेसवर त्यांनी अतिशय मनोहारी शेती फुलवलीय आहे. सुजाताताई यांनी गेल्या पाच वर्षापासून कष्ट करून टेरेस गार्डन फुलवल आहे. या टेरेस गार्डनमध्ये आंब्याची पाच प्रकारची झाडे आहे. त्याचप्रमाणे चिकू, अंजीर, रामफळ, पालक मेथी, भेंडी, गवार, वांगी, कोबी, मुळा, कोथिंबीर, चिली टमाटर, कांदा, बटाटा, रताळी फुलकोबी, पानकोबी तर मोगरा, चाफा, जास्वंद, गुलाब, शेवंती, निशिगंधा अशा विविध भाज्या फुलझाडे लाऊन यांची गार्डन कम शेती फुलवली आहे. 

घरी आलेल्या पाहुण्यांनाही देतात भेट 

बाजारातून आणलेल्या भाज्या दोन ते तीन दिवसात खराब होतात. मात्र आपल्या घरी सेंद्रिय पद्धतीने टेरेसवरती छोटसं गार्डन केलं तरीही पौष्टिक भाज्या मिळू शकतात. दरम्यान आपल्या घरी आलेल्या पै पाहुण्यांना सेंद्रिय पद्धतीने केलेल्या गार्डन मधील भाज्या द्यायला त्या विसरत नाही. आपल्या घरी भाज्या झाडांची पाने कोमेजलेली फुले हे सर्व एका ड्रममध्ये टाकून कुजून त्याचे खतही तयार करून फळभाज्यांना देतात. तर कढीपत्त्याचा अर्क काढून तोही भाज्यांना फुलांच्या झाडांना देतात.