मावळ : महिलांच्या गळ्यातील मंगळसूत्र तोडून पसार होणारी टोळी सक्रिय झाली होती. या टोळीचा तपास करताना लुटणाऱ्या सराईत गुन्हेगारास मालमत्ता गुन्हे विरोधी पथकाने अटक केली आहे. फिल्मी स्टाईलने या चोरट्यांचा पाठलाग करत पोलिसांनी एकाला ताब्यात घेतले असून एकूण ६ लाख ५३ हजार १५६ रुपयांचा मुद्देमाल जप्त केला असून आरोपीकडून नऊ गुन्ह्यांची कबुली मिळाली आहे.

पिंपरी चिंचवड पोलीस आयुक्तालय हद्दीतील तळेगाव दाभाडे, चिखली, बाणेर, चतुर्श्रृंगी व शिक्रापूर या परिसरात मागील काही दिवसांपासून रस्त्यावरून पायी जाणाऱ्या महिलांच्या गळ्यातील मंगळसूत्र तोडून चोरटे पसार होत होते. त्यांचा शोध सुरु असताना गौरव अनिल सरोदे (वय २४, रा. चाकण परिसर) याला पोलिसांच्या पथकाने ताब्यात घेतले आहे. त्याच्याकडून पोलिसांनी चार चैन स्नॅचिंग, चार घरफोड्या आणि एक मोटारसायकल असा एकूण नऊ गुन्ह्यांचा छडा उघड केला आहे.

सीसीटीव्ही फुटेजमधून उलगडा
रावेत व चिखली परिसरातील महिलांच्या गळ्यातील मंगळसूत्र लुटल्याच्या गुन्ह्यांचा तपास करताना खाजगी सीसीटीव्ही फुटेजच्या आधारे आरोपीचा शोध घेण्यात आला. रावेत येथे लाल हुडी आणि चिखली येथे निळी हुडी परिधान करून गुन्हे करणारा एकच व्यक्ती असल्याचे स्पष्ट झाले. यानंतर पुढील तपासात आरोपी हा चाकण परिसरात वास्तव्य करत असल्याचे समोर आले.

१५  किलोमीटरचा पाठलाग
दरम्यान मालमत्ता गुन्हे विरोधी पथकाचे वरिष्ठ पोलीस निरीक्षक विजय धमाले यांच्या मार्गदर्शनाखाली पथकाने आरोपीस पकडण्यासाठी सापळा रचला. मात्र पोलिसांची चाहूल लागताच आरोपी पळून जाऊ लागला. यानंतर पोलिसांनी त्याचा पाठलाग सुरु केला असता पोलिसांनी पंधरा किलोमीटर फिल्मी स्टाईलने पाठलाग करून सराईत गुन्हेगाराला अखेर ताब्यात घेतले. या कारवाईत साडेसहा लाख रुपयांचा मुद्देमाल हस्तगत केला असून आरोपीकडून आणखी गुन्ह्यांचा तपास सुरू आहे.