मावळच्या तळेगाव दाभाडे येथील परिसरात एका ८ वर्षीय मुलीसोबत भयंकर प्रकार घडला आहे. २५ फेब्रुवारी २०२६ रोजी सायंकाळी साडेचारच्या सुमारास ही घटना घडली. याप्रकरणी पोलिसांनी आरोपीला अटक केली असून पुढील तपास सुरु केला आहे. या घटनेनंतर लहान मुलांच्या विशेषतः मुलींच्या सुरक्षिततेवर प्रश्न निर्माण झाला आहे.

मिळालेल्या माहितीनुसार, २५ फेब्रुवारी २०२६ रोजी सायंकाळी साडेचारच्या सुमारास तळेगाव दाभाडे येथील सिल्वर विंग अपार्टमेंटमध्ये आठ वर्षांची मुलगी इमारतीखाली खेळत होती. याचवेळेस त्याच परिसरात गॅरेजवर काम काम करणाऱ्या एका कामगाराने तिला पाठीमागून पकडून गैरवर्तन केले.

त्याच्या अश्लील स्पर्शाने मुलगी घाबरली. तिने नराधमाच्या तावडीतून स्वतःची कशीबशी सुटका केली. घाबरलेल्या अवस्थेत मुलीने घरी जाऊन पालकांना घडलेला प्रकार सांगितल्यानंतर कुटुंबीयांनी तात्काळ पोलिसांत धाव घेत तक्रार दाखल केली.

तक्रारीनंतर तळेगाव दाभाडे पोलिसांनी तत्काळ कारवाई करत संशयिताला ताब्यात घेतले आणि अटक केली. आरोपीविरोधात संबंधित कलमांनुसार गुन्हा दाखल करण्यात आला असून पुढील तपास सुरू आहे. या घटनेमुळे परिसरात संतापाची लाट उसळली असून नागरिकांकडून आरोपीवर कठोर कारवाईची मागणी होत आहे.