मराठा आरक्षणासाठी आमरण उपोषणाला बसलेल्या जरांगेंनी आता नवा डाव टाकण्याची रणनीती आखलीय. आगामी विधानसभा निवडणुकीसाठी ते हा नवा डाव टाकणार आहेत. आगामी विधानसभा निवडणुकीसाठी जरांगेंनी आता थेट विधानसभा निवडणूक लढवण्याची तयारी सुरू केलीय.

त्यासाठी सर्व इच्छुकांना 27 ऑगस्टला हजर राहण्याचं आवाहन जरागेंनी केलंय. मराठ्यांच्या आरक्षणासाठी जरी जरांगेंनी हा डाव टाकण्याचा प्लॅन केला असला तरी त्यांनी विधानसभेसाठी इतर जातींसोबत मोट बांधून थेट सत्ता मिळवण्याची रणनीती आखलीय.

मनोज जरांगे पाटील यांनी थेट इच्छुकांचा डेटाच गोळा करायला सुरू केलीय. जरांगेंनी राज्यभरातल्या सर्व 288 मतदारसंघांमधल्या इच्छुकांची बैठकच बोलावलीय. एवढंच नव्हे तर सर्व जातीधर्मातल्या इच्छुक उमेदवारांचा निवडणुकीसाठी विचार करणार असल्याचं जरागेंनी सांगितलंय.

मराठा आरक्षणासाठी जरांगेंनी उभारलेल्या आंदोलनाला 29 ऑगस्टला वर्ष पूर्ण होतंय. मात्र वर्षभरात जरांगेंनी आरक्षणासाठी अनेकदा उपोषणं आणि आंदोलनं केली. सरकारनं त्यांना आश्वासन देत आंदोलनं मागे घ्यायला लावली, मात्र कुणबी नोंदी शोधण्याशिवाय जरांगेंच्या आंदोलनाला अजूनही यश आलेलं नाही.

त्यामुळे आता वर्षपूर्तीच्या मुहूर्तावर जरांगेंनी सरकारकडे मागणी करण्यापेक्षा थेट सरकारच स्थापन करण्याची रणनीती आखलीय. ऐन विधानसभा निवडणुकीच्या तोंडावर जरांगेंनी हा डाव टाकलाच तर त्यांना किती यश येणार याबाबत सा-या राज्याला उत्सुकता लागलीय.