कुणबी नोंदींच्या मुद्द्यावरून मराठा आंदोलक मनोज जरांगे यांनी पुन्हा एकदा उपोषणाची घोषणा केलीय. यासाठी जरांगे थेट मुंबईत धडक देण्याच्या तयारीत आहेत. जरांगेंनी येत्या 29 ऑगस्टला हजारो मराठ्यांसह आंदोलनाचा इशारा दिलाय. यासाठी आझाद मैदानात कुच करणार आहेत. तर दुसरीकडे, ओबीसी नेते लक्ष्मण हाकेंनीही 1 सप्टेंबरला मुंबईत महामोर्चा आयोजित केलाय. मात्र, या दोन्ही नेत्यांना आंदोलनापूर्वीच मोठा झटका बसलाय. राज्याच्या गृह विभागानं मुंबईतील आंदोलनासंदर्भात नवे आदेश काढलेत.

आंदोलनाआधी आझाद मैदानावर नियमावली

दक्षिण मुंबईत मोर्चांना बंदी, केवळ आझाद मैदानातच आंदोलनाला परवानगी

आंदोलनासाठी एकाच दिवसाची परवानगी, सकाळी 9 ते 6 वेळ निश्चित

7 दिवस आधी आंदोलनासाठी अर्ज करणे अनिवार्य

आंदोलनात ट्रॅक्टर, बैलगाडी, जड वाहने, प्राणी आणण्यास सक्त मनाई

झेंड्याची काठी 2 फुटांपेक्षा जास्त लांब नसावी

आमरण उपोषण, आत्मदहन, अन्न शिजवण्यास बंदी

सरकारच्या नियमावलीनुसार, आता मराठा ओबीसी आंदोलकांना आझाद मैदानाव्यतिरिक्त मुंबईतील अन्य कोणत्याही भागात आंदोलन करता येणार नाहीये. मात्र, मराठा आणि ओबीसी समाज आंदोलनाच्या भूमिकेवर ठाम असल्याचं दिसतंय. गेल्या वेळी जरांगेंना सरकारनं आझाद मैदानात आंदोलनाची परवानगी दिली खरी मात्र जरांगे पाच दिवस ठाण मांडून बसले होते आणि सरकारची कमालीची अडचण झाली होती. त्यामुळे गृह खात्यानं यावेळी सावध भूमिका घेत नव्या अटी लागू केल्याचं दिसतंय. राज्य सरकारनं आंदोलनासाठी मुंबईत आझाद मैदान हे एकमेव अधिकृत ठिकाण घोषित केलंय. यामुळे मराठा आणि ओबीसी आंदोलकांची कोंडी होण्याची शक्यता आहे. मात्र जरांगे सरकारच्या अटी पाळणार की धुडकावणार? की त्याआधीच सरकार तोडगा काढणार याकडे लक्ष लागलंय.