गेल्या वर्षभरापासून राज्यात मराठा आरक्षणावरुन मराठा आणि ओबीसी असा संघर्ष सुरु आहे. लोकसभा निवडणुकीतही त्यांचे पडसाद उमटले. सत्ताधारी महायुतीला मोठा फटका बसला. राज्यात ठिकठिकाणी मेळावे घेऊन सुरु झालेलं भुजबळ विरुद्ध जरांगे यांचं वाकयुद्ध आजही कायम आहे.

मराठ्यांना स्वतंत्र १० टक्के आरक्षण देण्याचा निर्णय राज्य सरकारनं घेतलाय. मात्र सगेसोयऱ्यांना कुणबीचे दाखले देण्यासाठी जरांगेंचा लढा सुरुच आहे. सरकारला १३ जुलैपर्यंत एक महिन्याची मुदत देऊन त्यांनी उपोषण स्थगित केलं. मात्र भुजबळांवर त्यांचे प्रहार सुरुच आहेत. मराठ्यांचं आरक्षण हिसकावून घेण्यात भुजबळांचं आयुष्य गेल्याची टीका जरांगेंनी केली आहे.

जरांगे अशी तिखट टिका करत असताना भुजबळही ओबीसी आरक्षणाला धक्का लागता कामा नये या भुमिकेवर ठाम आहेत. मलाही कितीही शिव्या दिल्या तरी मागे हटणार नाही, असं ते म्हणालेत.

तर दुसरीकडे जालन्यात उपोषणाला बसलेले ओबीसी नेते लक्ष्मण हाके यांनीही जरांगेंवर निशाणा साधलाय. 'फोडा आणि झोडा' ही जरांगेंची नीती असल्याचीही टीका हाकेंनी केलीय.

आरक्षणाच्या मुद्यावरुन राज्यात मराठा आणि ओबीसी अशी दुफळी निर्माण झाली आहे. सगेसोय-यांबाबतच्या मुद्यावर सरकार काय तोडगा काढणार हे महत्वाचं आहे. अन्यथा आगामी विभानसभा निवडणुकीच्या पार्श्वभूमिवर जरांगे आणि भुजबळांमधला संघर्ष आणखी तीव्र होण्याची चिन्हं आहेत.