नगरपरिषद आणि नगरपंचायत निवडणुकीत महायुतीतील मित्रपक्षांमधील संघर्ष टोकाला गेलाय. त्यातच आता भाजप आणि शिंदेसेनेनं स्वबळाची भाषा बोलायला सुरुवात केलीय. भाजपनं तर थेट मुंबईत भाजपचाच महापौर, असा नारा दिलाय. त्यामुळे शिंदेसेना अस्वस्थ झालीय. खरंतर नगरपरिषद निवडणुकीत मतदारांनी भाजपच्या बाजूने कौल दिल्याची चर्चा रंगलीय. त्यामुळे आत्मविश्वास वाढलेल्या भाजपनं मुंबई महापालिकेसाठी इच्छुकांच्या मुलाखती घेतल्यात.

त्यात 6लोकसभा मतदारसंघातून 1800 जण इच्छूक असल्याचं चित्र आहे. त्यामुळे एका वॉर्डात 7-8 जण इच्छूक असल्याने भाजपने स्वबळाच्या हालचाली सुरु केल्याची माहिती सुत्रांनी दिलीय..मात्र राज्यभरात भाजपनं शिंदेसेनेचं टेन्शन वाढवायला सुरुवात केलीय.

संतोष बांगर, शहाजीबापू पाटील यांच्यावर धाडी

सिडको घोटाळा प्रकरणासाठी चौकशी समिती

शिंदेसेनेच्या नेत्यांचे विरोधकांचा भाजप प्रवेश

नगरपालिका आणि नगरपंचायत निवडणुकीसाठी भाजपनं स्थानिक पातळीवर युतीचा निर्णय घेण्याचे अधिकार दिले... त्यामुळे राज्यात वेगवेगळ्या पक्षांसोबत युती आणि आघाड्या झाल्या. मात्र खरा संघर्ष रंगला तो महायुतीतील भाजप आणि शिंदेसेनेत. त्यामुळे महाविकास आघाडीतील काँग्रेस, ठाकरेसेना आणि पवारांच्या राष्ट्रवादीची चर्चाच झाली नाही. आताही भाजप आणि शिंदेसेनेनं दिलेले स्वबळाचे संकेत महाविकास आघाडीवरुन लक्ष हटवण्यासाठी आहेत की ही महायुतीतील नुराकुस्ती असणार आहे.. असा प्रश्न विचारला जातोय.