नंदुरबार जिल्ह्यातील धडगाव तालुक्यातून मोठी बातमी समोर आली आहे. अवैध दारूवर कारवाई करण्यासाठी गेलेल्या राज्य उत्पादन शुल्क विभागाच्या पथकावर जमावाने हल्ला केल्याची खळबळजनक घटना घडली आहे. शिवाय निगदी फाटा परिसरात आरोपींनी पथकावर दगडफेक करत जप्त केलेली दारू आणि वाहन बळजबरीने पळवून नेले. याप्रकरणी अज्ञातांविरोधात गुन्हा दाखल करण्यात आला आहे.

मिळालेल्या माहितीनुसार, निरीक्षक राजेश सपकाळ यांच्या पथकाने निगदी शिवारात छापा टाकून १९ लाख ४० हजार रुपये किमतीचा मुद्देमाल जप्त केला होता. यामध्ये विदेशी दारूचे २०० बॉक्स आणि एका पिकअप वाहनाचा समावेश होता. मात्र, कारवाई सुरू असतानाच बुधा झांगडे आणि सुरेश झांगडे यांच्यासह १० ते १२ जणांच्या जमावाने पथकाला घेरले.

मात्र, कारवाई सुरू असतानाच बुधा झांगडे आणि सुरेश झांगडे यांच्यासह १० ते १२ जणांच्या जमावाने पथकाला घेरले. वाहन पुढे नेल्यास जिवंत सोडणार नाही, अशी धमकी देत आरोपींनी जोरदार दगडफेक केली आणि जप्त केलेला मुद्देमाल बळजबरीने पळवून नेला.

या घटनेमुळे जिल्ह्यात खळबळ उडाली असून शासकीय कर्मचाऱ्यांच्या सुरक्षेचा प्रश्न ऐरणीवर आला आहे. धडगाव पोलीस ठाण्यात आरोपींविरुद्ध विविध कलमान्वये गुन्हा दाखल करण्यात आलेला आहे.