महापालिका निवडणुकांमध्ये भाजप क्रमांक एकचा पक्ष ठरला. तर दुसऱ्या क्रमांकावर शिवसेना शिंदे गट राहिला. दरम्यान महापालिका निवडणुकीमध्ये अनेक ठिकाणी शिवसेना शिंदे गटानं भाजपसोबत युती केली होती. महापालिकेनंतर राज्यात जिल्हा परिषद आणि पंचायत समिती निवडणुकांचं बिगूल वाजलं.

या निवडणुकांच्या पार्श्वभूमीवर राज्याच्या राजकारणात घडामोडींना वेग आला असून यावेळी दोन्ही शिवसेना एकत्र आल्या आहेत. सोलापूर जिल्हातल्या बार्शीनंतर आता माढ्यात देखील दोन्ही शिवसेना एकत्र आल्याने भाजपला मोठा धक्का बसलाय. इतकेच नाही येथे भाजपसाठी मोठं आव्हान उभं राहिलंय.

माढ्यात शिवसेना ठाकरे गट आणि शिवसेना शिंदे गट आणि दोन्ही राष्ट्रवादींची युती झाली आहे. भाजपच्या पॅनलविरोधात हे चारही पक्ष एकत्र आले आहेत. माढ्याचे खासदार धैर्यशिल मोहिते पाटील आणि आमदार अभिजीत पाटील यांच्या नेतृत्वाखाली हे पॅनल तयार करण्यात आलंय. येथे भाजपला सत्तेपासून दूर ठेवण्यासाठी दोन राष्ट्रवादी कॉग्रेस पक्ष एक झालेत. दुसरीकडे शिवसेना शिंदे गट आणि शिवसेना ठाकरे गट देखील एकत्र आलेत.

दरम्यान नगरपालिका आणि महानगरपालिकेच्या निवडणुकीत भाजपनं राबवलेल्या बिनविरोध पॅटर्न झेडपीमध्येही दिसत आहे. कोकणात भापजने बिनविरोधचा धडाका लावलाय. तेथे जिल्हा परिषद आणि पंचायत समितीत १० जणांचा बिनविरोध विजय झालाय.