Maharashtra : काँग्रेसचे माजी आमदार मधुकर ठाकूर यांचे सुपुत्र आणि महाराष्ट्र प्रदेश काँग्रेसचे चिटणीस प्रवीण ठाकूर यांनी अजित पवार यांच्या राष्ट्रवादी काँग्रेस पक्षात प्रवेश केला. काँग्रेसमध्ये नाराज असल्याने प्रवीण ठाकूर पक्षातून बाहेर पडले. दोन मोठे नेते लागोपाठ साथ सोडून गेल्याने काँग्रेसला राज्यामध्ये मोठा धक्का बसला आहे.

अलिबाग येथे प्रवीण ठाकूर यांच्या पक्षप्रवेशाचा कार्यक्रम पार पडला. उपमुख्यमंत्री अजित पवार, राष्ट्रवादी काँग्रेस पक्षाचे प्रदेशाध्यक्ष सुनील तटकरे आणि अन्य महत्त्वाच्या नेत्यांच्या उपस्थितीत प्रवीण ठाकूर यांचा पक्षप्रवेश झाला. ठाकूर यांच्यानंतर महाविकास आघाडीमधील आणखी एक नेता अजित पवाराच्या राष्ट्रवादीत येणार असल्याची चर्चा रंगली आहे.

भूम, परंडा, वाशी मतदारसंघाचे माजी आमदार राहुल मोटे हे सध्या शरद पवार यांच्या राष्ट्रवादी गटामध्ये आहेत. ते शरद पवारांची साथ सोडून उपमुख्यमंत्री अजित पवार यांच्या गटात जाणार असल्याची चर्चा सुरु आहे. ५ ऑगस्ट रोजी त्यांचा पक्षप्रवेश होणार असल्याची शक्यता वर्तवली जात आहे. अजित पवार यांच्या उपस्थितीत त्यांचा राष्ट्रवादीत प्रवेश होणार असल्याचे म्हटले जात आहे.

शिवसेनेचे आमदार तानाजी सावंत यांच्या विरुद्ध राहुल मोटे विधानसभेची निवडणूक लढवली होती. आता ते राष्ट्रवादी अजित पवार गटामध्ये जाणार असल्याच्या चर्चा सुरु आहे. त्यांच्या क्षेत्रात यासंबंधित कार्यकत्यांसह बैठकी झाल्याचे म्हटले जात आहे. जर राहुल मोटे अजित पवार यांच्यासोबत जाणार असतील, तर तो राष्ट्रवादी शरद पवार गटासाठी मोठा धक्का असेल.