सरसकट मराठा समाजाला ओबीसीतून आरक्षण मिळावं, अशी मागणी मनोज जरांगे पाटील करत आहेत. त्यांच्या या मागणीला अनेक आमदार, खासदारांनी पाठिंबा दिलाय. मनोज जरांगे यांच्या या मागणीमुळे ओबीसींमध्ये अस्वस्थता निर्माण झालीय. पहिल्यांदाच मंत्री छगन भुजबळ सक्रिय झाले असून त्यांनी तातडीनं बैठक बोलावलीय.

मनोज जरांगे यांनी यांनी मराठा आरक्षणासाठी मुंबईतील आझाद मैदानात आंदोलन करत आहेत. जरांगे यांच्या मागणीला ओबीसी नेते लक्ष्मण हाके यांनी विरोध दर्शवला असून ते आक्रमकपणे आपली भूमिका मांडत आहेत. राज्यभरात ओबीसी संघटना उपोषणाला बसण्याच्या तयारीत आहेत. नागपूरमध्ये साखळी उपोषणाला सुरुवात करण्यात आलीय. तर जालना जिल्ह्यात येत्या १ सप्टेंबरपासून ओबीसी संघटना आपले उपोषण चालू करणार आहे.

जरांगेंनी 'चलो मुंबई'चा नारा दिल्यापासून ते आंदोलन सुरू होईपर्यंत छगन भुजबळ कुठेच दिसत नव्हते. दरम्यान जरांगे यांचे आंदोलन तीव्र झाल्यामुळे मात्र भुजबळ सक्रिय झालेत. मिळालेल्या माहितीनुसार भुजबळ यांनी राज्यातील ओबीसी नेत्यांची बैठक बोलावलीय. छगन भुजबळ यांनी राज्यातील सर्व ओबीसी नेत्यांना मुंबईत बोलावलंय. १ सप्टेंबर रोजी ओबीसी नेत्यांनी मुंबईत यावे आणि बैठकीत सहभागी व्हावे, असा संदेश भुजबळ यांनी दिलाय.

त्यामुळे आता ओबीसी नेत्यांमध्ये नेमकी काय चर्चा होणार? या बैठकीतून नेमकी काय भूमिका घेतली जाणार? याकडे सर्वांचेच लक्ष लागले आहे. सध्या तरी मराठा समाजाला ओबीसीतून आरक्षण देऊ नये, अशी भूमिका ओबीसी नेत्यांची आहे. आता मराठा समाजाप्रमाणे ओबीसी समाजही आंदोलनाच्या मैदानात उतरणार का? ओबीसी नेते छगन भुजबळ यांच्या नेतृत्त्वाखील होणाऱ्या बैठकीत आंदोलनाची हाक दिली जाणार का? याकडे सर्वांचे लक्ष लागले आहे.