संजय सुर्यवंशी, साम टीव्ही

नांदेड महापालिकेत 81 पैकी 45 जागा जिंकून भाजपने एकहाती सत्ता मिळवली. आज आरक्षण सोडतीत नांदेड माहापलिकेचे महापौर पद सर्व साधारण महिला प्रवर्गासाठी आरक्षित झाले. भाजपकडून सर्व साधारण महिला प्रवर्गातून एकुण 12 उमेदवार निवडून आले. त्यापैकी चार जणांची नावं महापौर पदासाठी स्पर्धेत आहेत. ज्योती कल्याणकर, सुदर्शना खोमने, वैशाली देशमुख आणि कविता मुळे या चार जणांची नावे सद्या चर्चेत आहेत.

ज्योती कल्याणकर ह्या प्रभाग क्रमांक १ मधून दुसऱ्यांदा निवडून आल्या आहेत. यापूर्वी कल्याणकर ह्या काँग्रेसमध्ये होत्या, माजी मुख्यमंत्री तथा खासदार अशोक चव्हाण यांनी भाजपामध्ये प्रवेश केल्यानंतर ज्योती कल्याणकर यांनी देखील अशोक चव्हाण यांच्या नेतृत्वात भाजपमध्ये प्रवेश केला होता. अशोक चव्हाण यांनी कल्याणकर यांना भाजपकडून प्रभाग क्रमांक १ मधून तिकीट दिले आणि त्या निवडून आल्या आहेत. सर्वसाधारण महिलासाठी महापौर आरक्षण जाहीर झाल्याने कल्याणकर या पदासाठी दावेदार मानल्या जात आहेत.

सुदर्शना खोमणे ह्या प्रभाग क्रमांक १० मधून निवडून आल्या आहेत. त्यांचे पती महेश उर्फ बाळू खोमणे हे राजकारणात सक्रिय आहेत. बाळू खोमणे हे भाजपचे प्रदेश कार्यकारणी सदस्य असून माजी विरोधी पक्ष नेता म्हणून देखील त्यांना महापालिका कारभाराचा अनुभव आहे. भाजपमध्ये बाळू खोमणेंचं वजन पाहता महापौर पदाची माळ त्यांच्या पत्नी सुदर्शना खोमणे यांच्या गळ्यात पडू शकते असा अंदाज बांधला जात आहे.

वैशाली देशमुख ह्या प्रभाग क्रमांक ६ मधून निवडून आल्या आहेत. महापालिका सभागृहात जाण्याची ही दुसरी वेळ आहे. या पूर्वी देखील त्यांनी भाजपकडून याच प्रभागातून निवडून आल्या होत्या. त्यामुळे वैशाली देशमुख यांना देखील महापौर पदाची लॉटरी लागू शकते.

कविता मुळे ह्या प्रभाग क्रमांक २ मधून भाजपकडून निवडून आल्या आहेत. त्यांना नगरसेवक पदासाठी दुसऱ्यांदा संधी मिळाली आहे. महापालिका स्थायी समितीच्या सदस्य म्हणून त्यांना संधी मिळाली होती. अशोक चव्हाण यांचे निकटवर्तीय म्हणून कविता मुळे यांची ओळख आहे. त्यामुळे कविता मुळे यांना भाजपाकडून महापौर पदाची लॉटरी लागू शकते