Summary -

• कुर्डुवाडी येथील सभेत जयकुमार गोरे यांनी महिलांबाबत विवादित विधान केले

• 'नवराही १०० रुपये देत नाही, देवाभाऊंनी १५०० दिले', असे ते लाडक्या बहिणींना म्हणाले

• पैसे घ्या पण मत भाजपलाच द्या, असा थेट सल्ला त्यांनी मतदारांना दिला

• या विधानामुळे राजकीय वर्तुळात चर्चा सुरू झाली

विजय पाटील, सांगली

'तुमचा नवरासुद्धा १०० रुपये देत नाही. देवाभाऊंनी १५०० दिले. त्याची जरा इमानदारी ठेवली पाहिजे', असं खळबळजनक वक्तव्य ग्रामविकास मंत्री तथा सोलापूरचे पालकमंत्री जयकुमार गोरे यांनी केले आहे. त्यांच्या या विधानामुळे राजकीय वर्तुळात खळबळ उडाली आहे. तसंच, 'निवडणुकीसाठी विरोधकांच्या घरात आणि बंगल्यात पैसे आले आहेत. कुणाचे ही पैसे. कुणाच्या बापाचे नाहीत ते आपलेच आहेत. कमिशनमधून कमावलेले आहेत. ते पैसे घ्या. पण मत भाजपलाच द्या.', असे देखील ते म्हणाले. कुर्डुवाडी येथील प्रचार सभेत बोलताना त्यांनी थेट मतदारांना मतदानासाठी पैसे घ्या असाच थेट सल्ला दिला आहे.

कुर्डुवाडीतील प्रचार सभेत जयकुमार गोरे यांनी लाडक्या बहिणींना उद्देशून अजब विधान केले. ते म्हणाले,'येत्या २ तारखेला मतदान आहे. पैसा कुणाचा पण घ्या. काही फरक पडत नाही. सगळ्याचे पैसै घ्या पण मत त्यांना देऊ नका. मतदानाला जाताना देवाभाऊचे १५०० रुपये विसरु नका. इमानदारी ठेवा. तुम्हाला स्वत:चा नवरा सुध्दा १०० रुपये देत नाही. देवाभाऊनी लाडकी बहीण योजना आणली.१५०० रुपये तुम्हाला दिलेत. १५०० रुपयाची इमानदारी तुम्ही ठेवली पाहिजे. देवाभाऊ नसले तर तुमच्या खात्यातील पैसै बंद होतील.'

तसंच, 'आपला सख्खा भाऊसुध्दा राखी पोर्णिमेला १०० रुपये टाकताना त्याच्या बायकोकडं पाहतो. तीने मान हालवली तरच तो ताटात टाकतो आणि बायकोनं नाही म्हटलं की तो परत १०० रूपये खिश्यात घालतो. आता साडीचा तर विषयच संपलाय. राखी पोर्णिमेला साडी मिळतच नाही. मुख्यमंत्री देवेद्र फडणवीस १५०० रुपये आपल्या खात्यात पाठवत आहेत. त्याची जरा इमानदारी ठेवली पाहिजे.', असं खळबळजनक विधान जयकुमार गोरे यांनी केले आहे. त्यांच्या या विधानाची राजकीय वर्तुळात चर्चा होत आहे.