विधानसभा निवडणुकीमध्ये महायुतीने महाविकास आघाडीचा पराभव केला. या निवडणुकीमध्ये २३२ विधानसभा मतदारसंघामध्ये महायुतीच्या उमेदवारांचा विजय झाला. या निवडणूक निकालानंतर मनोज जरांगे पाटील यांनी पहिली प्रतिक्रिया दिली. यावेळी मनोज जरांगे यांनी मोठी घोषणा केली. 'नवं सरकार स्थापन झाल्यानंतर पुन्हा आमरण उपोषण करणार.', अशी घोषणा जरांग पाटील यांनी केली.

मराठा आंदोलक मनोज जरांगे पाटील यांनी विधानसभा निकालावर साम टीव्हीला प्रतिक्रिया दिली. 'विधानसभा निवडणुकीचे निकाल जाहीर झाले असून राज्यामध्ये महायुतीला बहुमत मिळालं आहे. दरम्यान लोकसभेला महाराष्ट्रासह मराठवाड्यात जसा मनोज जरांगे पाटील फॅक्टर चालला तसा या विधानसभेला चालला नाही असं बोललं जात आहे. मात्र मी विधानसभेच्या रिंगणात नव्हतोच तर माझा फॅक्टर कसा चालणार.' , असे मनोज जरांगे यांनी सांगितले.

तसंच, 'मराठा आरक्षणासाठी नवीन सरकार स्थापन झाल्यानंतर आंतरवाली सराटीत सामूहिक आमरण उपोषण करणार.', अशी घोषणा देखील मनोज जरांगे पाटील यांनी यावेळी केली. याचच अर्थ मनोज जरांगे पाटील हे मराठा आरक्षणावर ठाम असून त्यांनी पुन्हा उपोषण करण्याचा इशारा दिला आहे. त्यामुळे नवं सरकार स्थापन झाल्यानंतर त्यांच्या समोर मराठा आरक्षणाचा मुद्दा कायम राहिल.

दरम्यान, राज्यात महायुतीला २८८ जागांपैकी २३२ जागांवर विजय मिळवण्यात यश आले. महायुतीमधील भाजपचे १३५ विधानसभा मतदारसंघातील उमेदवार विजयी झाले. शिवसेना शिंदे गटाचे ५७ विधानभा मतदारसंघातील उमेदवार विजयी झाले. तर अजित पवारांच्या राष्ट्रवादी काँग्रेस पक्षाचे ४१ विधानसभा मतदारसंघातील उमेदवार विजयी झाले. नव्या सरकारचा शपथविधी सोहळा उद्या होणार आहे. आज महायुतीमधील तिन्ही पक्षांचे नवनिर्वाचित आमदार मुंबईमध्ये दाखल झाले आहेत. राज्याचे मुख्यमंत्री कोण असेल हे आज स्पष्ट होईल.