विकास मिरगणे, साम टीव्ही, प्रतिनिधी

Maharashtra : स्थानिक स्वराज्य संस्थांच्या निवडणुकीला अवघे काही महिने उरले आहेत. जानेवारी २०२६ पर्यंत निवडणूका प्रक्रिया पूर्ण करण्याचे आदेश सर्वोच्च न्यायालयाने राज्य निवडणूक आयोगाला दिले आहेत. या पार्श्वभूमीवर निवडणुकीसाठी राज्यातील प्रत्येक पक्षाने मोर्चेबांधणी सुरु केल्याचे पाहायला मिळत आहे. याच दरम्यान राष्ट्रवादी काँग्रेस शरद पवार गटाला मोठा धक्का बसला आहे.

एका बाजूला निवडणुकांसाठी तयारी करत असताना शरद पवारांच्या राष्ट्रवादी काँग्रेस पक्षाला नवी मुंबईत खिंडार पडल्याची माहिती समोर आली आहे. राष्ट्रवादी काँग्रेसच्या बड्या नेत्याने पक्षाला सोडचिठ्ठी दिली आहे. या नेत्याने उपमुख्यमंत्री एकनाथ शिंदे यांच्या शिवसेना शिंदे गटात प्रवेश केल्याचे वृत्त आहे. यामुळे शिंदेसेनेची ताकद वाढली आहे.

मिळालेल्या माहितीनुसार, राष्ट्रवादी काँग्रेस शरद पवार गटाचे नवी मुंबईचे जिल्हाध्यक्ष चंद्रकांत पाटील यांनी पक्षातून बाहेर पडण्याचा निर्णय घेतला आहे. चंद्रकांत पाटील यांनी शिंदेसेनेत प्रवेश केला आहे. उपमुख्यमंत्री एकनाथ शिंदे यांच्या उपस्थितीत पक्षप्रवेश पार पडला. हा पक्षप्रवेशाचा कार्यक्रम ठाण्यातील एकनाथ शिंदे यांच्या निवासस्थानी पार पडला.

शिवसेना उपनेते विजय चौगुले यांच्या माध्यमातून राष्ट्रवादी काँग्रेस शरद पवार गटाचे चंद्रकांत पाटील यांचा शिंदेसेनेत प्रवेश झाला. पाटील हे राष्ट्रवादी काँग्रेस पक्षाचे नवी मुंबईचे जिल्हाध्यक्ष होते. पदाधिकारी, कार्यकर्त्यांसह चंद्रकांत पाटील यांनी शिवसेनेमध्ये पक्षप्रवेश केला आहे. यामुळे नवी मुंबईत शरद पवार गटाला धक्का बसला आहे, तर शिंदे गटाची शक्ती वाढणार आहे.