'मी शरद पवारांना सोडलं नाही. निधी मिळण्यात अडचण होती. आमदारांच्या आग्रहामुळे निर्णय घ्यावा लागला.', असे विधान राज्याचे उपमुख्यमंत्री अजित पवार यांनी केले आहे. बारामती दौऱ्यावर असताना अजित पवारांनी हे वक्तव्य केले आहे. अजित पवार हे बारामती तालुक्याच्या दौऱ्यावर आहेत. बारामती तालुक्यातील टाकळे गावात कोपरा सभेत अजित पवारांनी गावकऱ्यांशी संवाद साधला. यावेळी त्यांनी बारामतीकरांना जास्तीत जास्त निधी मिळवून देण्याचे आश्वासन दिले.

अजित पवारांनी सांगितले की, 'तुम्हाला वाटत असेल की या वयात अजित पवारांनी साहेबांना आता सोडायला नको होतं. मी साहेबांना सोडलं नाही. मी साहेबांना सांगत होतो सर्व आमदारांचे मत होते. सर्वांच्या सह्या आहेत. सर्वाचं मत होतं की सरकारमध्ये जावं. कारण कामाला स्टे आला होता. आपण मंजूर केलेल्या कामाला स्टे आला. हा तापच झाला. लोकं मला वेड्यात काढतील असं मला वाटले. स्टे मी नव्हता दिला सरकारने दिला होता. आता वेळ जाऊन चालत नाही.'

तसंच, '५ वर्षांतील अडीच वर्षे माझी वाया गेली तरी मी बारामती तालुक्याला ९ हजार कोटी रुपये आणले. मी खोटं बोलणार नाही. आता पण साडेतीनशे कोटींचा सासवड- भिगवणं रस्ता मंजूर केला. त्याचा गावकऱ्यांना फायदा होईल. मी अर्थमंत्री असल्यामुळे मी बारामतीकरांना निधी देऊ शकतो. माझ्याकडे साडेसहा लाख कोटी रुपयांचे बजेट आहे. त्यातून मला हजार कोटी रुपये काढणं काही अवघड नाही. निवडणूक आली म्हणून मी थापा मारत नाही.', असे अजित पवार यांनी गावकऱ्यांना स्पष्टपणे सांगितले.