भरत मोहळकर, साम टीव्ही प्रतिनिधी

अत्यंत चुरशीच्या झालेल्या विधानपरिषद निवडणूकीत महायुतीचे ९ आणि ठाकरे गट आणि काँग्रेसचा प्रत्येकी १ उमेदवार विजयी झालाय. मात्र शेकापच्या जयंत पाटलांचा पराभव झाला. त्यातच काँग्रेसची मतं फुटल्याची कबुलीच खुद्द काँग्रेस प्रदेशाध्यक्ष नाना पटोलेंनी दिली. तर क्रॉस वोटिंग करणारे आमदार आमच्या ट्रॅपमध्ये अडकल्याचंही नाना पटोलेंनी स्पष्ट केलंय.

विधानपरिषद निवडणूकीत काँग्रेसचं ३७ मतांचं संख्याबळ (Legislative Council Elections) होतं. त्यातच २०२२ प्रमाणे आमदारांनी क्रॉस वोटिंग केल्यास काँग्रेसचा उमेदवार पडू शकतो, ही शक्यता होती. त्यामुळे काँग्रेसने प्रज्ञा सातव यांना निवडून आणण्यासाठी २८ मतांचा कोटा ठरवून दिला होता. मात्र त्यातील ३ मतं फुटली तर नार्वेकरांना दिलेली ५ मतं फुटली.

त्यामुळे आमदारांनी दगाफटका केल्यानंतरही प्रज्ञा सातवांच्या पराभवाची नामुष्की टळली. मात्र आमदारांनी क्रॉस वोटिंग केल्याने काँग्रेस अॅक्शन मोडवर आलीय. तसंच क्रॉस वोटिंग करणाऱ्या आमदारांवर कारवाईचा इशारा नाना पटोलेंनी (Congress Leader Nana Patole) दिलाय.

एकीकडे नाना पटोलेंनी फुटीर आमदारांना इशारा दिलाय. तर या फुटीर आमदारांमध्ये विदर्भातील १, मराठवाड्यातील ३, उत्तर महाराष्ट्रातील २ आणि मुंबईतील १ आमदाराचा समावेश असल्याची माहिती सूत्रांनी (Maharashtra Politics) दिलीय. त्यामुळे काँग्रेस फुटीर आमदारांवर काय कारवाई करणार? हे पाहणं महत्वाचं ठरणार आहे. विधानपरिषद निवडणुकीमध्ये शेकापच्या जयंत पाटलांचा पराभव झालाय.