Summary -

• भाजप आमदार अमरीश पटेल यांनी लाडकी बहीण योजनेबाबत मोठे विधान केले

• शिरपूर-वरवाडे नगरपरिषद निवडणूक प्रचारादरम्यान त्यांनी हे विधान केले

• लाडकी बहीण योजना बंद झाली तर आमदारकीचा राजीनामा देईन, असे त्यांनी सांगितले

• शिंदेसेना मतदारांना खोटं सांगत असल्याचा पटेल यांचा आरोप

भूषण अहिरे, धुळे

'लाडकी बहिणी योजना बंद पडली तर आमदारकीचा राजीनामा देईन.', असं मोठं विधान आमदार अमरीश पटेल यांनी केले आहे. शिरपूर वरवाडे नगर परिषदेच्या निवडणुकीदरम्यान माजी मंत्री आणि आमदार अमरीश पटेल यांनी हे विधान केले. शिरपूर वरवाडे नगर परिषदेच्या निवडणुकीसाठी भाजप आणि शिंदे सेनामध्ये चुरस बघायला मिळत आहे. अशातच आमरीश पटेल यांनी केलेल्या या विधानाची राजकीय वर्तुळाच चर्चा रंगली आहे.

'शिंदेसेनेच्या वतीने प्रचारादरम्यान मतदारांना जर शिंदेसेनेचे उमेदवार निवडून आले नाही तर लाडकी बहीण योजना बंद पडेल असा खोटा प्रचार केला जात असल्याचा आरोप आमदार अमरीश पटेल यांनी विरोधकांवर केला. हा चुकीचा प्रचार केला जात असल्याचे म्हणत अमरीश पटेल यांनी राज्याचे मुख्यमंत्री देवेंद्र फडणवीस आहेत आणि लाडकी बहीण योजना ते बंद होऊ देणार नाही. जर लाडकी बहिणी योजना बंद झाली तर मी आमदारकीचा राजीनामा देईल.'असे भर सभेमध्ये जाहीर केले.

आज प्रचाराचा अखेरचा दिवस असल्यामुळे प्रचाराच्या तोफा चांगल्याच तळपल्या आहेत आणि या दरम्यानच आता जास्तीत जास्त मतदारांपर्यंत पोहोचून आपल्या उमेदवारांचा प्रचार सर्वच पक्षाच्या पक्षश्रेष्ठींतर्फे करण्यात येत आहे. यादरम्यानच भाजपचे नगराध्यक्ष पदाचे उमेदवार चिंतन भाई पटेल यांच्या प्रचारार्थ सभेदरम्यान अमरीश पटेल यांनी लाडकी बहीण योजनेबाबत मोठं विधान केले. याची आता सर्वत्र चर्चा होत आहे.