मुंबई, ता. ११ जुलै २०२४

लोकसभा निवडणुकीत पिछेहाट झाल्यानंतर आगामी विधानसभेच्या दृष्टीने भारतीय जनता पक्षाने सावध पवित्रा घेतला आहे. एकीकडे लोकसभेतील यशानंतर वजन वाढलेल्या शिवसेना शिंदे गटाने १०० जागांची मागणी केली असताना आता भाजप १६० ते १७० जागा लढवणार असल्याची मोठी माहिती समोर आली आहे.

समोर आलेल्या माहितीनुसार, लोकसभेनंतर राज्यात विधानसभा निवडणुकांचे वारे वाहू लागले आहेत. आगामी विधानसभा निवडणुकांसाठी भारतीय जनता पक्षाने मोर्चेबांधणी सुरू केली आहे. याबाबत आता एक महत्वाची माहिती समोर आली असून विधानसभेत भाजप १६० ते १७० जागा लढवणार असल्याचे सांगण्यात येत आहे.

भाजपने १६० च्या खाली जागा लढू नये, अशी स्थानिक नेत्यांची मागणी असून त्यादृष्टीने रणनिती आखली जात असल्याचे बोलले जात आहे. परंतु भाजपच्या या दाव्यामुळे महायुतीत जागा वाटपावरुन वादाची ठिणगी पडण्याची शक्यता आहे. कारण लोकसभा निवडणुकीत यश मिळाल्यानंतर शिवसेना शिंदे गटाने विधानसभेला १०० जागांची मागणी केली आहे.

दुसरीकडे राष्ट्रवादी अजित पवार गटही ७०- ८० जागा मागण्याची शक्यता आहे. त्यामुळे एकट्या भारतीय जनता पक्षाने १६० ते १७० जागा लढवल्या तर शिवसेना शिंदे गट आणि अजित पवार यांच्या राष्ट्रवादीच्या वाट्याला काय येणार? असा सवाल आता उपस्थित होत आहे.